بعض النصائح للي بيفكر يشتغل في الخليج او جايله فعلا عرض عمل :


المرتب : متفرحش ان المرتب عامل كام بالمصري ، انت حتصرف هناك بالعملة المحلية مش بالجنيه ، فاوعى تقول كده بالمصري حيساوي واوووووو ، اعرف المصاريف المطلوبه الاول


الامثلة التاليه هي ارقام حقيقية من قطر والامارات ، الارقام كلها لحياة متوسطة ولا انت مزنق نفسك ولا انت فاتح عالاخر لاسرة من 4 افراد اب وام وطفلين في الشهر


السكن : متوسط سعر شقة اوضتين غير مفروشة 5500 ريال/درهم شهريا يعني حوالي 11500 جنيه ‏‎smile‎‏ رمز تعبيري


متوسط سعر شقة اوضتين مفروشة 7000 ريال/درهم شهريا يعني حوالي 14400 جنيه


الاكل والشرب : متوسط حوالي 3000 ريال/درهم شهريا يعني حوالي 6400 جنيه


استهلاك الكهربا والميه والانترنت المنزلي : متوسط 500 ريال/درهم شهريا يعني حوالي 1100 جنيه


المدارس بتبدأ 7000 ريال/درهم الى 100000 وده آخر رقم شوفته يمكن في اعلى


اللبس : في حاجات اغلى من مصر وحاجات ارخص


اسئلة مهمة لازم تعرفها قبل ماتسافر


التأمين الصحي : لازم يكون ليك تأمين صحي انت واسرتك ، لو مافيش حتلبس جامد جدا ، الادوية والدكاتره غالين جدا لو حتدفع من جيبك ، اديك مثال بسيط ، في نقط للانف مش فاكر اسمها كنت بجبها لابني في مصر ب 2 جنيه ، في قطر جبتها ب 30 ريال ‏‎smile‎‏ رمز تعبيري


اهمهم هو المسمى الوظيفي اللي حيتكتب في بطاقتك ، في شركات بتستهبل وتكتب فني ولا عامل وانت تكون مهندس ولا محاسب ولا اي مهنة تانية كويسه ، اعرف كويس قوي واتفق عالمسمى الوظيفي اللي حيتكتب في البطاقة واوعى يضحكوا عليك لان لو مثلا اتكتبت فني مش حتعرف تطلع رخصة سواقة ولا تجيب مراتك وعيالك ولو حتسافر داخل دول الاتحاد الخليجي مش حتعرف تاخد فيزا عند الوصول في المطار visa on arrival، لازم تقدم قبل السفرعالفيزا ، وفي حاجات تانيه كتير مرتبطة بالمسمى الوظيفي


اعرف كوبس قوي ايه اللي مكتوب في الاوفر واقراه كويس جدا وخد بالك من التالي
السكن : هل الشركة حتوفرهولك ولا حتديلك بدل سكن ولا حتقولك اتصرف انت
لو الشركة حتوفرلك السكن اعرف السكن عذابي ولا عائلي لو معاك مراتك وعيالك
لو عذابي اعرف يبعد قد ايه عن الشغل وهل في مواصلات ولا لأ ولو لأ ايه الحل وحكون لوحدي في السكن ولا معايا حد ولو معايا حد كام واحد ، النقطة ديه كام واحد مهمة جدا لان في شركات بتسكن 6 في اوضه ، ايوا انت قريت صح 6 أشخاص في اوضه ، طبعا لو انت رايح على وظيفة كويسه مش مفروض انك تلاقي الكلام ده بس في شركات بتستهبل


لو عائلي اسأل كام اوضه وهل يشمل الكهربا والميه والانترنت ولا لأ ، هل مفروش ولا لأ ، في اجهزة المطبخ تلاجة وغسالة وبوتجاز الخ ولا لأ ، اعرف كل التفاصيل ومتخفش وانت بتسأل ومتتكسفش ده بيزنس وده حقك


لو مش حيوفروا سكن اسأل هل في بدل سكن في المرتب ولا لأ ، المفروض يكون في بدل سكن وارجع لفوق لنقطة اسعار السكن عشان تفهم وتربط الامور ببعض


نقطة مهمة اوي لو حتاخد مراتك وعيالك وهو المرتب كام لو مافيش بدل سكن ، القانون في قطر بيقول
عشان تجيب الاسرة لازم مرتبك ميقلش عن 7000 ريال لو الشركة حتوفرلك السكن او 10000 لو مش حتوفرلك السكن بجانب المسمى الوظيفي ميكونش عامل طباخ فني خياط الخ من المهن الحرفية.


اسأل تعرف تجيب اسرتك بعد وقت اد ايه ، الطبيعي حيكون بعد ماتخلص فترة الاختبار الاولى probation period واللي غالبا بتكون 6 شهور او 3 شهور وبعدها بتحتاج حوالي شهر إجراءات


اسأل على ال Job description لان بعد ماتيجي ممكن يخلوك تعمل عجين الفلاحة عشان تحافظ على شغلك