انا هقول لكم الخطه اللي كنت راسمها.. والخطوات اللي اخدتها ..
والفكره جت لي لما أخذت محل كبير للملابس في مدينه نصر.. ففكرت اني اعمل جزء للمنتجات الصغيره اللي عليها طلب..
زي توك الاطفال واكسسوارات الاطفال واي رفايع صغيره لا تزيد عن 2.5جنيه واقل..
الجزء دا كان بيبيع بمكاسب كبيره جدا ..
الخطه؛
فكرت اني اعمل اعلان واطلب 10شباب مندوبين
هدي كل شاب عشر دست 120قطعه تكلفتها 180جنيه=اجمالي ال10شباب1800ج.
1200قطعةهتتباع ب2.5 =3000ج
التكلفه 1800-3000=1200ج مكسب يومي
تعالوا بقي نخصم..
60جنيه لكل مندوب =600 جنيه
هوالك حاجه باظت حاجه اتسرقت 100جنيه
مكسب صافي 500جنيه
اوم ايه


ابتديت انفذ فعلا وجبنت 2مندوبين اجرب فيهم لكن جبت منتجات ب5جنيه تتباع ب7.5 جنيه.. الاتنين مناديب بس عملوا 300جنيه في اليوم..
طبعا موضوع هايل جدا جدا
وكنت شاري لهم استوك كبير من البضاعه.. وبعد ماخلصوها.. كان عندي ضغط شغل جامد ويمكن كسلت اني اروح لهم مخصوص انقي بضاعه تانيه يوزعوها واسيب شغلي.. واهملت الموضوع..
لكن فعلا انا ساعتها كنت مش مشغول بشغل وفاضي .. كنت هكمل وهزود المناديب وخصوصا اني كنت عامل لهم خريطه بكل منطه هينزلوا فيها..
ومحفظهم اسلوب الكلام مع الناس.. مش يدخل يقول كلام يزهق الناس منه
كان اسلوب تاني خالص
كان معاه كروت للمحل.. مع كل منتج علشان لو منتج باظ او طلع فيه عيب يتصلوا بينا ونغيره فورا.. ليه بقي؟ لان التجاره مكسب وخساره
لان احنا عايزين كل قرش حد يدفعه يكون راضي عنه..
كانت تجربه ناجحه جدا.. وكانت من ضمن اقتراحاتي للشباب فكانوا بينفزوها لغايه ما يعملوا مبلغ محترم.. وبعدين ابتدوا يشتغلوا جمله من بيت احدهم وبعدين اجروا محل وربنا كرمهم اخر كرم.
واحد كان بيقول العربيه ب120ألف جنيه كان بيقول يعني لازم كل شهر احوش 1000جنيه لمده 120شهر يعني عشر سنين علشان اجيب العربيه دي.. ودا مستحيل.. و
وكنت ديما اقوله متتحسبش كده.. انت اسعي.. والباقي بتاع ربنا.
ودارت الايام وقبل ال10سنين كان عنده عربيه بأكتر من المبلغ دا وفيلا في اكتوبر.. وودلوقتي بسم الله ماشاء الله..
سعي.. وكان سمعته كويسه في السوق وكان التجار بيدوله بضاعه بالأجل علشان سمعته.. وكان منتظم في السداد.. ولنيته الطيبه لقي محل سعره مناسب..
وابتدي المشوار.. ومازال بفضل الله ربنا يبارك له.
علشان كده انا مهتم جدا بالمشاريع الصغيره.. بل ومتناهية الصغر.. لاني عشت بنفسي تجارب كتير جدا بدأت بأقل القليل وبفضل الله وصلت بسعيها وسمعتها الطيبه ونيتها الكويسه لما لا يتوقعوه هم أنفسهم.
لاتيأسوا.. أسعوا بنيه طيبه.. ابنوا سمعه طيبه.. توكلوا علي من بيده مفاتيح كل شئ.. تفاءلوا.. وبأذن الله هيرضيكم.
صباحكم سعاده