من أكبر الأخطاء اللى ممكن يعملها بعض الناس اللى بيشتغلوا فى الاتش آر – انهم يدرسوا ادارة الموارد البشرية بصورة نظرية أو يقرأوا عن موضوع فى الموارد البشرية فى كتاب جميل وبعدين يروحوا يتحمسوا يحاولوا ينفذوا بعض النظم اللى درسوها بشكل نظرى أو قرأوا عنها…ومايقدروش يكملوا المشروع…ويقف المشروع…ويفشل المشروع…وياخدوا هما ختم الفشل اللى يلزق فيهم…وتتحول ادارة الموارد البشرية لنموذج المشروعات الفاشلة فى الشركة…


والحقيقة أنا شفت بنفسي كتير من الناس اللى درسوا ادارة الموارد البشرية بصورة نظرية عند ناس ماعنهدهمش أى خبرة عملية – عندهم بس شوية كتب – زى كتاب جارى ديسلر – وقصص وحكايات – مثلا – عن نظام رائع لل Competency Modelling اتعمل فى مايكروسوفت أمريكا وكان نتيجته ارتفاع ارباح الشركة 500 دشليون دولار…وقصص حلوة تحمس الغلابة اللى شغالين فى الاتش آر…اللى يروحوا يحاولوا ينفذوا نفس النظام…وللأسف…علشان اللى درسوه كلام نظرى من غير أى خبرة عملية…بيفشل المشروع…وياخدوا هما ختم الفشل…


يا جماعة الاتش آر…قبل ما تعلن عن أى نظام عايز تنفذه فى الاتش آر…خد خبرة عملية الأول…وجرب النظام ده فى مكان تطوعى زى جمعية أهلية مثلا…وبعدين جربه كمان مرة تانية فى ادارة واحدة صغيرة فى الشركة…قبل ما تعلن عنه للشركة كلها…لإنك لما حتجربه حتكتشف أيه الى ينفع وأيه اللى لازم يتغير


يا جماعة الاتش آر…لو أخدت ختم الفشل مرة واحدة فى الشركة…حيكون صعب عليك جدا أنك تمسحه…ربنا يبعد عنك الختم ده