1- لما تتطوع لمساعدة حد فى شغله عرفه ان دى مساعدة منك عشان ميتحولش الموضوع لجزء من وظيفتك مستقبلا
2- متعملش شغل بالحب, امن نفسك بأيميل او ورق رسمى من مديرك بالشغل ده
3- اكسب الناس بالكلمة الحلوة والنصيحة والابتسامة, العلاقات الحلوة بتنجح الشغل
4- متنتظرش حد يعلمك, اسأل كتير عشان تتعلم وجرب واغلط واطلب النصيحة
5- متقللش من حد مهما كان منصبه او خبرته, كل شخص ممكن يفيدك بحاجة
6- لما تعمل انجاز فى شغلك اتكلم عنه, ووضح المشكلة وازاى اتحلت والنتيجة النهائية وازاى هتفيد الشركة او الناس كلها
7- ارجع الفضل لاهله, لو حد ساعدك بحاجة او علمك حاجة اشكره قدام الناس
8- الاهم من الشغل, ظبط الشغل واللى اهم منهم هو عرض الشغل (التنسيق والترتيب والاهتمام بشكل الشغل وطريقه عرضه ممكن يميزك عن اى حد, فا اعرض شغلك كويس)
9- اتكلم مع مديرك بأستمرار واسأله عن ال Feedback بتاعته عنك وايه نصايحه ليك
10- متسكتش على الغلط حتى لو مش هتعرف تغيره على الاقل وضح وجهة نظرك وازاى ممكن نغيره, عشان لو سكت يبقى انت ممكن تشارك فيه مستقبلا
11- متبخلش بمساعدة او علم على حد, حاول تضيف قيمة للى حواليك وده هيتردلك قدام
12- طور نفسك بأستمرار لحد ما مؤهلاتك وخبرتك تكون اكبر من وظيفتك, سعتها ممكن تطلب تترقى او تروح لوظيفة افضل فى شركة اكبر
13- متفضلش فى نفس الوظيفة اكتر من 3 سنين,
ده لو عايز تتعلم وتكتسب خبرات مختلفة وتكسب اكتر, الاستقرار هو عدوك فى بداية حياتك