- ليه الإمارات بتفرض 1000 دولار كاش مع المسافر المصرى قبل خروجه من مصر حتى لو معاه التأشيرة وكله تمام ؟
لان فى عدد كبير من الشباب المصرى فى الشوارع الاماراتيه بدون سكن او فلوس وكانو جايين على وعد بشغل - عقد مضروب - هيبحثوا عن شغل وفلوسهم خلصت ولم يجدوا وجميعهم مش عاوزين يرجعوا مصر مكسورين محطمين .
- ليه تأشيرة تركيا بقت صعبه للمصريين مع انها كانت الاسهل دايما لدرجة ان الشركات زمان كانت بتجيبها بدون ماحد يروح السفاره اصلا ؟
اولا بسبب الهجوم الاعلامى الدائم على الاتراك دون التفرقه بين الحكومه والشعب
ثانيا بسبب جروبات فيسبوك الخاصه بتجمعات المصريين واللى بيتناقشوا فيها ازاى يضربوا ورق السفاره ويزوروا كشوفات حساب وتأمين .
ثالثا لنفس اسباب الامارات وهى ان الشباب ميعرفوش غير اسطنبول ورايحين على امل ان تركيا حاجة فظيعه وفيها فلوس وشغل وللاسف دا كله غلط وفى حاصلين على دكتوراه هناك بيناموا فى الشارع ومش لاقيين شغل لاسباب لن يتسع ذكرها .
- ليه دخول لبنان بقى صعب عالمصريين ؟
لبنان بدون تأشيرة وبتحصل على ختم دخولها فى مطار رفيق الحريرى باظهار حجز الفندق والعوده و 2000 $ فى ايدك . السلطات اللبنانيه لاحظت فى الفتره الاخيره شباب كتير قدموا الى لبنان واتنصب عليهم بحجه عقود عمل بالدولار , والمعروف ان اهل لبنان نفسهم مش عارفين يعيشوا ومقضينها قروض واغلبهم بيسيبوا البلد . ففى ترحيل كتير الفترة الاخيره بمجرد وصولك لمطار بيروت لمجرد انك شاب ومصرى حتى لو رايح فعلا سياحه مش لاى هدف تانى فلازم تثبت دا وانك مش هتهرب هناك ولا هتسبب لهم ازمه .
- ليه عقود العمل فى السعوديه مرتبات قليله للمصرى دون عن غيره ؟
المكاتب المصرية بتبيع الشباب فى سوق رخيص لكفيل ارخص , وبتتنافس بين بعضها البعض عن مين اللى هيجيب موظفين تخصصات طب وهندسه وصيدلة بأقل راتب ممكن وسكن كانه سجن , الجاليه المصريه واقعيا ملهاش سفاره مصريه تسأل عنهم ووجودها زى عدمه بالنسبه للعاملين هناك , المصريين كمان مع بعض بما انهم طالع عنيهم وتحت ضغوط طول الوقت فبيتعاملوا مع بعض بشكل معين وبيوقعوا بعض ودا بالمقارنه بالجاليات التانيه بيقلل قيمتنا الحاليه والمستقبليه .
- ليه الشاب المصرى صعب يكون سائح فى اوروبا - اميركا ؟
ايطاليا مثلا بتعانى من البطاله بشكل مهول ورغم كدا هتلاقى المصريين فى اغلب شوارعها كاسرين فيزا او وصلوا تهريب عن طريق البحر ومش لاقين شغل وشكلوا مافيات صغيره بالتعاون مع الاتراك والروس , وبدأ انتشارهم فى فرنسا وبعض دول شرق اوروبا , فأصبح اى شاب مصرى بيتقدم للحصول على تأشيرة سياحه لأى دولة اوربيه او اميركا هوا هارب مجرم محتمل فرفضه احسن , الا لو اثبت بأوراق ومستندات وصور وفلوس انه مجرد سائح .
- ليه كوريا بترجع المصريين من المطار ؟
كوريا الجنوبيه تأشيرتها كانت من المطار زى لبنان بالنسبه لجواز السفر المصرى , غير ان فى تعاون دائم بين الحكومتين فى المنح وتبادل الطلاب والموظفين الحكوميين فى قطاعات معينه , فى الفترة الاخيره ظهرت نفس الفكرة المذكوره : مكاتب مصريه فى مصر وبتعمل اعلانات يراها الاعمى قبل البصير بتوفير عقود عمل فى كوريا . فالحكومه هناك اتفاجئت ان فى كم كبير وفى تزايد من المصريين فى الشوارع وعاطلين وبدون سكن او اكل , وبالتالى فهما اقرب لارتكاب الجرائم فالبتالى امنع اى مصرى من الدخول حتى لو جاى مؤتمر علمى كبير , الا لو اثبت بكل الطرق انه مجرد ضيف وهيمشى على طول
- ليه دول اميركا الجنوبيه بترفض المصريين ؟
تأشيرة دخول دول اميركا الجنوبيه كانت سهله جدا للمصريين ولكن انتشر فى الفترة الاخيره عدد كبير من الشباب بيسافر هناك يتجوز بنت وياخد اقامه او جواز سفر ويرميها او يهرب من الحدود لاميركا , كمان نصبايه مشهورة من مكاتب فى وسط البلد انهم مقابل مبلغ هيسفروك وفى خلال 6 شهور هتستلم باسبور لاحد الدول هناك وبيه تقدر تسافر لاكتر من 100 دولة بدون تأشيرة والكلام غلط ووصلتهم شكاوى كتير والحكومة المصرية مش متعاونه فالبتالى امنع المصريين خالص بلا وجع دماغ
- ليه السوريين تسهيلاتهم اكتر من المصريين عموما ؟
اولا وصول سورى لاوروبا دا اعجاز واسمها رحله الموت من لحظه خروجه من سوريا او تركيا , ولكن لما بيوصل بياخد امتيازات مش بياخدها المصري لاسباب كتير اهمها انهم فى حالة حرب , ثانيا ان السورى رغم كل مافيه من بلاوى ميعرفهاش غير اللى عاشرهم بيشتغلوا , بيبنوا , بيعمروا , الهدف الاول جوازهم من بعض مش الجواز من اوربيه عشان الباسبور , دا غير انهم بيتعلموا بسرعه وبيكملوا تعليمهم رغم كل التحديات فالبتالى لو جبت شاب سورى ومصرى والاتنين وصلوا تهريب لكندا مثلا وهيا دولة محايده ومقدمه نفس التسهيلات للجنسيتين فالسورى هيكون اسرع فى كل شىء والمصرى احتمال كبير يترحل او يرجع او لو قعد بشكل قانونى مش هيشتغل وهيقعد يولول عالغربه وسنينها ووجعها ويوضح اد ايه هوا متبهدل ومش لاقى ياكل ومشرد او يتصور مع كل واحده يشوفها فى الشارع عشان يرسم نفسه على اصحابه وانه فظيع وكدا .
- وايه الحل ؟
* صدقنى الحكومه لوحدها مش مسئولة عن دا , احنا كمان مسئولين جدا عن اللى بيحصل لأننا لسه عايشين فى الماضى المظلم ومش حابين نتعب ودى حقيقة ولو سمحت اسمعها وخلينى افكرك بيها وتفكرنى بيها , الحل اننا نكف عن التفاعل مع الفئات دى من البشر . بمثال بسيط
شركة طارحه عقود عمل مهندسين برواتب قليله ! دى اصلا متستحقش تتفاعل مع البوست بتاعهم او حتى تتصل بيهم , صدقنى النصاب او الرخيص لازم يتساب كدا , مش هنموت من الجوع ولكن بعد فترة قليله هتلاقى العروض كلها رفعت . لازم تعب ولازم بحث ولازم صبر ولازم تحدى ولازم يكون فى اخلاق فعلا وهدف ودايما فى سؤال للنفس احنا ليه بنعمل كدا ؟ عشان الحياه تكون احسن واللى بعدنا يرتاحوا اكتر . الانانيه بتدمرنا كلنا
* مترخصش نفسك وتسمع كلام عيال شبيحه اقصى نجاحاتهم هروب عبر البحر واشتغلوا نقاشين فى فرنسا وتخليهم يتنكوا عليك يامتعلم , انت مش هارب ولا مجرم وربنا عطانا موهبة التعليم والعقل والحكمة فبلاش نستسهل ونقرا ونتابع صفحات المراهقين الكبار قبل الصغيرين لأن كلامهم الغبى حلو وسهل . وخد فرصه لعقلك ودور على كل شىء بالعقل , وارجوك لو شوفت حد ناوى يهرب او يكسر حاول تمنعه عن دا وبعدها تعلمه يهندل وضعه ازاى , يعنى بنفس فلوس السفر الغير شرعى والركض الدائم من الشرطة وحالة الخوف اللى ملهاش اى داعى ولا سبب ممكن الفلوس دا بشوية علم وبحث على جوجل لا يتضمن كلمات مثل ازاى اهرب بطريقة سهله وبدون فهلوه , مفييييش شىء سهل , لكن فى عمل = نتيجه .
* كل بلاد ربنا حلوه وفيها عدل وظلم ولكن بمقاييس , وتجربتى مختلفه تماما عن جارى المصرى اللى عايش جمبى وهاجر بنفس طريقتى , اقصد حياتنا فعلا مختلفه واللى يناسبه لا يناسبنى , فدايما متسألش حد كل الاسئلة , كفايا خطوط عريضه , وطريقة الحياه دى بتاعتك انتا وبس وبس وبس ومفيش تانى له الحق فيها ولا تقلد حد لان كل لحظة العالم بيتغير وقوانينه بتتبدل , فبلاش تهلك نفس وتجرى ورا السراب
انت مش بتخرج من مصر عشان تتقهر على نفسك.