1- لما تلاقي اعلان يقولك ( مرتب يصل الي ) .. كلمه يصل الي دي يعني gross salary يعني اجمالي ..
يعني مثلا لما تلاقي اعلان يقولك مرتبات تصل الي 7000 جنيه مثلا فمعني كدة ان ال basic salary بتاعك اللي هو الاساسي هيكون الف جنيه أو الف ونص بالكثير وباقي المرتب دة هيكون تارجت لازم تحققه والا مش هتاخدة .. وفعلا مش هتاخدة مهما عملت


2- لما تلاقي اعلان يقولك شيفتات متغيره معناها انك هتشتغل ( عبد ) حرفيا
العبيد بتوع زمان كان الامير او الملك يصحيهم وقت ماهو عايز .. 6 الفجر ماشي .. 9 بليل ماشي .. المهم ان ملكش معاد محدد .. وقت ما يتطلب منك تيجي هتيجي .. مرة شيفت من 4 ل 10 ومرة من 9 ل 5 ومرة من 3 ل 11 وهكذا .. مرة يجيبك الفجر ومرة الصبح ومرة العصر ومرة العشاء
3- لما تلاقي اعلان يقولك لا يشترط خبره ولا مؤهل ولا سن ولا لغه ونقبل طلبه
معناها ان الشغلانه دي محدش بيقعد فيها وال turn over فيها عالي جدا واي حد فيها مبيكملش شهرين عشان كدة بيحتاجوا ناس دائما ..
4- لما تلاقي اعلان يقولك الانترفيو ف نقابه أو مكان عام معناها ان دي شركه اوت سورس ( مندوب وسيط بين صاحب الشغل والموظف ) وان المكان دة متأجر بالساعه عشان يجمعوا عدد ويشوفوا مين فيهم هينفع يتضحك عليه وياخد الكورس ابو 500 جنيه عشان يشتغل
الانترفيوهات الحقيقيه مع الشركات الاصليه بتتم في مقر الشركه نفسها مع الاتش ار الاصلي والحقيقي ال بيكون مسؤل في الشركه