انا شايف ناس مفزوعة وبتقول جوجل هتوقف الموبايلات الهواوي واللي معاه موبايل يلحق يبيعه قبل ما جوجل تعطلّه وكده.


اللي حصل تحديدًا ان جوجل كشركة امريكية وقّفت كل علاقاتها مع شركة هواوي بعد ما ترامب وضع الاخيرة علي قائمة الشركات المحظورة.


نظام اندرويد اللي جوجل مالكة "لعلامته التجارية" هو نظام مفتوح المصدر، يمكن لأي شخص في العالم استخدامه مجانًا وبدون اي شروط.


اللي حصل ان جوجل بتقدم خدمات مدفوعة الأجر بجانب نظام التشغيل لشركة هواوي ، الخدمات دى بتتمثل في حق استخدام تطبيقات جوجل واشهرهم واهمهم تطبيق "بلاي ستور"، وبتتمثل في تقديم دعم فني لهواوي والمهندسين اللي عندهم فيما يتعلق بنظام الاندرويد، وبتتمثل كمان في ان جوجل بيديهم التحديثات الأمنية قبل الاعلان عنها بشكل عام. دى اللي جوجل وقفتها بس!


بالنسبة لبلاي ستور، جوجل متقدرش تشيله من الموبايلات الموجودة واللي اتباعت بالفعل، متقلقش يعني لو معاك موبايل هواوي، مش هيروح منك، وبالنسبة للدعم الفني هواوي يجيبوا مهندسين من برة، طبعًا شركة جوجل خبرة في النظام اكتر بس عادي يعني ممكن بسبب ان المطورين بتوع هواوي هيرتاحوا اخيرًا من شروط واحكام جوجل يبدعوا حاجات مختلفة.


فالموضوع كله يعني لو معاك موبايل هواوي هو التحديثات الأمنية هتجيلك متأخر شوية يا برنس بس كده، الفكرة كلها بقى في المستقبل هل هواوي هتعمل اب ستور محترم وتكمل تطوير في اندرويد ولا هتعمل لموبايلاتها من هنا ورايح نظام تشغيل جديد ولا اصلًا ترامب هيعقل ويهدي الدنيا ويرجع ف كلامه كالعادة؟ ادينا هنشوف