١- استنزف كل طاقة اللي شغالين معك.
٢- اوعى تسيطر على المشاكل وما تحطلهاش حلول، وسيبها تكبر لحد ما تبقى مشاكل شخصية مش مشاكل مُقتصرة على شغل.
٣- اخلق بيئة عمل "طاحنة".
٤- ما تقدّرش الناس اللي بتشتغل معك.
٥- قول أنا دارس إدارة وقاري لي كام كتاب كتير.
٦- انت ما بتغلطش ده شئ أساسي، اللي معك هم اللي بتوع مشاكل وحوارات، لكن انت زي الفل وسَوي.
٧- ما تخلقش علاقات طيّبة مع كل الناس اللي بتشتغل معك وتسعى تعرفهم وتخليهم مرتاحين فـ المكان، وتروح بس للناس اللي بتطبّل لك.
٨- خلّي الناس اللي بتشتغل معك ما تحسّش ناحيتك بأي أمان.
٩- هات ناس سويّة وشاطرة في شغلها وبتحبه جدًا وكرهّهم في اللي بيعملوه، وما تعرفش تستغل الطاقة البشرية اللي عندك، وقول اصل انا ما كنتش عايز دول خالص من البداية!
١٠- تحسسّ اللي بيشتغل معك إن إنت حاجة كبيرة اوي، وهو حاجة حقيرة جدًا وانت اللي في إيدك كل حاجة.
١١- في اي موقف قول التايتل بتاعك على طول، دي معروفة دي.. "أنا مدير المكان يا جماعة ازيكم؟ مين اللي جاب الورقة على مكتب مدير المكان؟"
١٢- اي نجاح بتاع أي حد بيشتغل معك انسبه لك، وقول ان ده بسببك وخد الصورة.
١٣-حسس الناس انهم لا ينتموا للمكان بأي شكل من الأشكال وما تتقبلش اختلافهم.
١٤- اي حد يقول حل غيرك، اشطب عليه وهات ناس تشطب عليه.
١٥- لو بيشتغل معك ناس صغيرة في السن اتعامل معهم على انهم صغيرين ورأيهم مش مهم.


"هالة عمرو"