كتير مننا مش بيخدوا بالهم من النقطة دي وفرص مهمة بتضيع منهم وهما مش فاهمين السبب الحقيقي من وراها، علشان كده قررنا نتكلم النهارده عن إزاي ممكن طريقة لبسنا تأثر على حصولنا على وظيفة معينة، لأن الموضوع رغم إنه يبدو بسيط إلا إن في دراسات كتير اتعملت عنه وأثبتت إنه مؤثر.


لازم نفهم إن الهدوم اللي بنلبسها بتوصل رسائل عننا وبالتالي بتلعب دور كبير في إدراك اللي قدامنا لينا، ده غير إنها بتحدد طريقة تعاملهم معانا، ومستويات تقدمنا الوظيفي.


ودي حاجة أكدتها دراسة نشرتها مجلة "Business Research" المتخصصة في أبحاث قطاع الأعمال، واللي أظهرت إنه لبس هدوم من علامات تجارية فاخرة بيحسن من فرصنا في الحصول على الوظائف.


الموضوع مش بيقف عند التعيين لكن طريقة اللبس بتأثر على فرص الترقي في العمل، وبحسب مسح أجرته شركة "OfficeTeam" المتخصصة في مجال التوظيف هنلاقي إن 80% من المديرين التنفيذيين شايفين إن طريقة اختيار الموظف لهدومه بتأثر على ترقياته في العمل.


كمان في دراسة أجرتها كلية كيلوج للإدارة بجامعة نورث وسترن الأمريكية أظهرت إن كل ما كان الشخص مظهره حسن ولائق كل ما ده انعكس بشكل إيجابي على أداءه في العمل لأنه بيمنحه ثقة أكبر في نفسه وقدراته.