هو انا شخصيا متفهم إن الظروف المحيطه بينا بتساعد الشخص علي الإبداع وإتقان عمله والوصول لأعلي معدلات الإنتاجية زي إنه يبقي فيه نظام واضح ومدير بيشجعه وشركه عندها رؤية وفريق عمل متعاون لكن السؤال اللي لازم كل واحد فينا يطرحه علي نفسه لو كل ده مش موجود هل المفروض إنه يبقي صفر ؟ هل هو نفسه مش المفروض إنه عنده هدف وعنده شكل من أشكال التطوير والشغل علي نفسه وقدر من الضمير وتحمل المسئولية يجعله يشتغل علي نفسه ويحقق أهدافه حتي لو كل عناصر النجاح مش موجوده ؟
-أنا بعتبر إن أبرز محطات النجاح اللي صنعت محمد صلاح كواحد من أفضل 3 لاعبين في العالم لما كان متألق في بازل السويسري وراح تشيلسي لمدرب غير مقتنع بمستواه ولا مؤمن بيه وهو أصلا كمدرب سلوكه إنه لا يهتم بتطوير اللاعبين طيب محمد صلاح بقي اتضايق ولا قعد يعيط أو يغني (الدنيا زي المرجيحه يوم تحت ويوم فوق) ؟ ولا حتي عمل زي الأفلام العربي وقعد يشرب علشان ينسي ؟......لأ طبعا الراجل اتمرن وطور مستواه بشكل كبير جدا وكان لما يلعب بيتألق ويجيب إجوان ومع ذلك الماتش اللي بعده المدرب ما يلعبوش عادي جدا لحد ما جاتله فرصه إعاره في دوري أقل ونادي أقل مسك في الفرصه وبذل مجهود وتألق لحد ما لعب في روما وتألق وراح ليفربول وتألق وهكذا ...
أساس الموضوع إنه لم ينتظر الظروف المثالية لأنها غالبا لن تأتي ولكن هو تعامل مع اللي موجود واجتهد فيه وانا طبعا بدي مثل بمحمد صلاح كشخصية ناجحه لأن مساره الوظيفي معروف إنما أنا شخصيا أعرف ناس كتير اشتغلوا في اماكن بيئة العمل فيها سيئة لكن كان عنده تحدي شخصي إنه ينجح لأن كل دقيقة وكل يوم محسوب عليه فماينفعش يبقي كسلان زي اللي حواليه ولا فاشل زي اللي حواليه إنما بيُنشيء عنده تحدي شخصي وإصرار علي النجاح مهما كانت بيئة العمل سيئة ومهما كان مديره مُحبط لحد ما بينجح ولما بينجح في جو زي ده ربنا بيكرمه ولما بيروح بيئة أفضل بيتألق وربنا بيعوضه وده السر إنك تلاقي اتنين زمايل في دفعه واحده بعد 20 سنه واحد منهم ناجح جدا وواحد فيهم لسه قاعد علي القهوة ومنتظر الفرصه المثالية لما تيجي ومقضيها شكوي من الظروف واهله وحبايبه والمجتمع والناس ...
=الخلاصة نجاحك وفشلك مسئوليتك الشخصية انت لوحدك ماحدش هاياخد إيدك ويقولك تعالي يا حبيبي أنا لازم أخليك تنجح وافتكر إن زي مافيه ناس بتفشل في بيئة عمل رائعة فيه ناس بتنجح في بيئة عمل سيئة والله المستعان