من أجمل ما قرأت من رباعيات صلاح جاهين
الدنيا من غير الربيع ميتة
ورقة شجر ضعفانة ومفتتة
لأ يا جدع غلطان تأمل وشوف
زهرالشتا طالع فى عز الشتا
===============
دخل الشتا وقفل البيبان عالبيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات أكتر بترفض تموت
================
وقفت بين شطين على قنطرة
الكدب فين والصدق فين ياترى
محتار هموت ..الحوت خرجلى وقال
هو الكلام يتقاس بالمسطرة
=================
فى يوم صحيت شاعر براحة وصفا
الهم زال والحزن راح واختفى
خدنى العجب وسألت روحى سؤال
أنا مت ولا وصلت للفلسفة
=================
غمست سنك فى السواد ياقلم
عشان ما يكتب شعر يقطر ألم
مالك جرالك أيه يا مجنون وليه
رسمت وردة وبيت وشمس وعلم
================
يأسك وصبرك بين إيديك وأنت حر
تيأس ما تيأس الحياة راح تمر
أنا دقت من دة ودة عجبى ولقيت
الصبر مر وبرضك اليأس مر
=================
ولدى نصحتك لما صوتى اتنبح
ماتخافش من جنى ولا من شبح
وإن هب فيك عفريت قتيل اسأله
ما دافعش ليه عن نفسه يوم ما اندبح
===============
أنا اللى بالأمر المحال اغتوى
شفت القمر نطيط لفوق فى الهوا
طلته ما طلتوشإيه أنا يهمنى؟
وليه؟مادام بالنشوة قلبى ارتوى
==================
الدنيا( صندوق دنيا ) دور بعد دور
الدكة هى ..وهى كل الديكور
يمشى اللى شاف ويسيب لغيره مكان
كان عربجى أو كان امبراطور
=================
خرج ابن آدم من العدم قلت ياه
رجع ابن آدم للعدم قلت ياه
تراب بيحيا وحى بيصير تراب
الأصل هو الموت ولا الحياة
===============
ضريح رخام فيه السعيد اندفن
وحفرة فيها الشريد من غير كفن
مريت عليهم ...قلت يا للعجب
لاتنين ريحتهم ليها نفس العفن
==============
رد مع اقتباس