الموضوع: اكتب أهدافك وخليها واضحة ومحددة وبلاش ترغي فيها مع أي أحد

للأسف في إشاعة اترسخت في عقول ناس كتير ألا وهي:
من الأفضل إني أقول أهدافي للناس عشان يشجعوني علي تحقيقها!!
لا حضرتك انسف الاعتقاد الخاطئ ده من دماغك !
.
طيب ليه متقولش أهدافك لحد ؟
1. دكتور Art Markman في مقالته المنشورة في موقع psychology today .. بيقول لما أحمد مثلا يقول لصاحبه حسين إنه عايز يطلع عالم فلك بمجرد ما بيقوله عن هدفه هو بالفعل بقى شايف إن حسين بدأ يفكر فيه كعالم فلك وبالتالي هو حقق جزء من هدفه في إبراز هويته، فلما بتعلن عن أهدافك لناس في زهو وافتخار وتحس انك خدت خطوة لقدام في تحقيقها وتشوف نظرات الإعجاب وتسمع كلمات المديح ده بيولد عندك شعور بالرضا والسعادة -اللي المفروض يكون عندك بعد تحقيق هدفك- فـ علماء النفس قالوا إن الشعور ده بيخدع عقلك الباطن وبيوهمه إن الهدف ده تم تحقيقه بالفعل وده اللي سموه العلماء بالـsocial reality وبالتالي احتمال إنك تحققه بيقل جدًا.
.
في دراسة في 2009 اتعملت على 163 شخص في أربع تجارب متفرقة، كل واحد دوّن هدفه الشخصي وطلبوا من نصهم الإعلان عن هدفهم قدام الناس والنص التاني التزم الصمت.
وأعطوا كل منهم 45 دقيقة للشغل في سبيل الوصول لهدفهم.
اللي التزموا الصمت اشتغلوا في المتوسط طوال الـ45 دقيقة، وأما سألوهم قالوا انهم كانوا حاسين إن قدامهم وقت طويل للوصول لهدفهم، في حين إن اللي أعلنوا عن هدفهم اشتغلوا في المتوسط لمدة 33 دقيقة وتوقفوا، وأما سألوهم قالوا إنهم كانوا حاسين إنهم أقرب لتحقيق هدفهم.
.
2. طبعا ده لو اللي انت قولته ده عجب اللي قدامك! أو كان اللي قدامك شخص إيجابي ومشجع! .. لكن ممكن جدًا اللي قولته ده ميعجبهوش أو يكون الشخص اللي قدامك محبِط أصلا، وخد بالك إن الشخص المحبِط مستحيل يقول على نفسه محبط بل بيقول على نفسه "واقعي" فهوب دابل كيك يحسسك إنك سارح في ملكوت في السما ويسود الدنيا في عينيك ويحسسك إن كل شيء مستحيل وأهم حاجة في الآخر يقولك أنا مش بحبطك بس بقولك الواقع!
.
3. اعرف المعلومة دي كويس: لو انت عندك دوافع داخلية -نابعة من رغبة حقيقة جواك- كافية لتحقيق الهدف ده مش هتحاول تبحث عن حافز خارجي عن طريق الإعلان عن هدفك للناس لتستجدي نظرات الإعجاب وكلمات التشجيع، أما لو الحافز الخارجي هو الوقود بتاعك للسعي -مش الدافع الداخلي- اعرف انك مش هتكمل!
.
4. أحيانًا بقى بيحصل الأخطر، إنك تصرح لشخص بفكرة نفسك تحققها فالاخ تعجبه الفكرة، فيكرهك فيها ويحبطك تحت شعار "أنا واقعي"، ويسرق هو الفكرة ويشتغل عليها ويحققها .. وحصلت كتير!
.
5. حتى لو اتكلمنا من الجانب الديني، فالنبي ﷺ قال: «استعينوا على قضاء حوائجكم بالكتمان» وكانت نصيحة سيدنا يعقوب لابنه سيدنا يوسف ألا يقصص رؤياه على إخوته ويلتزم الصمت فكانت النتيجة أن جعل الله رؤياه حقًا .. أنا شايف إن التزام الصمت هنا بجانب إنه وقاية من الحسد وكيد الإخوة لكن الموضوع له علاقة وثيقة بطبيعة النفس البشرية.
لكن لما تحقق بقى هدفك اتكلم براحتك «وأما بنعمة ربك فحدث».
.
الخلاصة: مع بداية 2017 اكتب أهدافك وخليها واضحة ومحددة وبلاش ترغي فيها مع أي أحد .. خلي عندك صبر وإرادة واستعن بالله ثم اعمل في صمت!

هههههه انت صحيح صحيح احسنت ابداااااااااااااااااااااا اع شكرا