الموضوع: 10 حاجات ينقلوا البيزنس بتاعك لمستوي إحترافي

خلينا نتفق إنك أثناء إدارة البيزنس الخاص بيك ، جت عليك فترة إنك عاوز تنقل البيزنس بتاعك لمستوي أعلي
فهنفترض إنك قمت بأكتر من Research وسألت مختصين قبلك في نفس المجال وقريت كتب ومجلات عشان توصل لإجابة ...
وخلينا نتفق إنه أهم أهم حاجة بالنسبالك كـ صاحب بيزنس إنك تكون سابق اللي حواليك و عارف دايما ايه هي الـ Next Step اللي مفروض تاخدها عشان تطور من البيزنس بتاعك
في الـ Article دي جمعنالك أكتر 10 حاجات ممكن تختار منهم الـ Next Step :

1- إفتح فرع تاني :
مبدائيا مش شرط يكون ده أول إختيار ليك ، ولكننا قلناه أول إختيار لأنه أكيد أول حاجة جت في دماغك ، وعشان عمل الخطوة دي صح ، مش كفاية إنك تكون عندك معلومات عن سوق معين متعطش للمنتج بتاعك فـ تروح تفتح فيه فرع تاني ، ولكن لازم تتأكد كمان من نقط زي :-
- إنك تسأل نفسك هل هاتقدر تحافظ علي الحد الأدني من الـ Profit اللي بتحققه علي مدار الخمس سنين اللي فاتوا ولا فتح الفرع التاني هيأثر علي فرعك الأساسي والعائد عليه
- لازم كمان تاخد فكرة عن إيه الـ Trend اللي منتشر في الفترة اللي هاتفتح فيها سواء كان الـ Trend ده علي المستوي الإقتصادي أو علي المستوي السلوكي للشراء في الفترة الزمنية دي ، بمعني إنك ممكن تكون فاتح مطعم قوي جدا ، بس الـ Trend دلوقتي هو عربيات الأكل المتحركة اللي بـ Style شبابي وملونة وبتقدم أكلات بسيطة وغريبة ، فـ هنا ممكن تحصلك إنت مشكلة لأنك مش مواكب الـ Trend
- لازم تتأكد إنك عندك System إداري قوي ، وفريق إدارة "إستثنائي" عشان يقدر ينظم نفسه ما بين الفرعين وميحصلش تقصير في أي مكان فيهم
- لازم طبعا تحضر Business Plan كاملة محترمة ، وتحدد بالظبط مصادر تمويلك للفرع الجديد
- وأهم حاجة إنك تختار المكان الجديد بناءا علي الأفضل للبيزنس .. مش الأفضل لميزانيتك .

2- قدم البيزنس بتاعك كـ Franchise .
والأختيار ده إحنا بنشوف إنه أذكي من إنك تفتح فرع تاني ، لأنك لما بتقدم البيزنس كـ Franchise لشخص في مكان تاني إنت بكده بتضمن سريان الـ System بتاعك بناءا علي معايير معينة بتعاقد معين ، وبتساعد في التجهيز المبدئي ، لكنك بترمي من علي ضهرك كل مهام الإدارة لشخص تاني هو من مصلحته إنه يمشي علي الـ System اللي إنت عامله للبيزنس بتاعك عشان تفضل إنت مديله حق الإنتفاع ده ، دور ورا الموضوع ده لأنك ممكن من خلاله يكون ليك أكتر من فرع في أكتر من دولة في العالم ، وإنت في مكانك

3- ترخيص المنتج أو الخدمة
والخطوة دي مهمة جدا لو بتقدم منتج أو خدمة (حصري) عندك ولسه محدش بيعملها في السوق ، بس مقصدش هنا بالترخيص التجاري ، ولكن أقصد ترخيص الملكية ، ملكية حق إنتاج المنتج ده سواء ماديا أو فكريا أو أدبيا ، الخطوة دي هاتعلي ثقة عملائك فيك وعلي المدي البعيد هاتصعب الأمور علي اللي عاوز يقلدك .

4- إعمل تحالف مع بيزنس تاني
شفت مثلا لما بينزل برطمان عسل أسود معاه برطمان طحينة تاني ، أو لما تجيب برسيل مثلا فتلاقي مكتوب ع العبوة ينصح بإستخدام ###### إيديال ، ده إسمه التحالف ، والتحالف ده ممكن يتم مع بيزنس مكمل للبيزنس اللي بتقدمه ، أو بيزنس مالوش علاقة باللي بقدمه ولكن بيستهدف نفس شريحة عملائك ، زي فودافون وبيبسي مثلا لما تشتري بيبسي فتكسب دقايق ، أو لما تشحن كارت إتصالات تاخد ساندوتش من ماك ، إعمل فكرة شبه الفكرة دي وهايحصل عندك فرق رهيب في النتايج

5- نوع الأنشطة اللي بتقوم بيها
لو مثلا عندك بيوتي سنتر ، ممكن جوه تبيعي Cosmetics ، لو عندك محل Shoes ممكن تبيع جنبها أحزمة وشرابات ، لو إنت صاحب شركة برمجيات ناجح ، إبدأ إدي الناس كورسات في مجالك ، كل دي أفكار ممكن تساعدك تنوع من مصادر دخلك جوه نفس البيزنس .

6- Target other Market
لو عندك بيزنس معتمد بنسبة ما علي وجود Website فممكن تستغله في إنك تفتح لنفسك أسواق بيع جديدة من خلاله ، يعني مثلا ممكن تكون فاتح في إسكندرية ولكن في شريحة عملاء قوية جدا ليك في الصعيد ، فـ ساعتها مش لازم تروح تفتح فرع تاني ، ولكن فكر في السبل اللي ممكن توصل منتجك من أسكندرية لعميلك في الصعيد وهو في مكانه وإنت في مكانك ، الموضوع ده ممكن يخليك تعيد النظر في أسواق كتير مكنتش مـ Target فيها أي حد .

7- فوز بتعاقد حكومي
من ضمن الحاجات اللي بتعلي مكانك في السوق هو التعاقدات الحكومية ، لأنك بتقدر تقدملها خدماتك تحت معايير خاصة بيك متوافق عليها من الجهة دي ، وده اللي بيضمن لك حاجتين ، إستمرارية الطلب ، ورفع الشأن في السوق ، لأنك وسط 10 مطاعم بيقدموا نفس الأكل ، يعني نفس المنتج ، أنت الوحيد اللي متعاقد مع رئاسة الوزاء مثلا ...

8- الدمج ، أو شراء شركات آخري
في الكام سنة اللي فاتوا مكانش فيه أكتر من أخبار الدمج ، واتساب إشتريتها فيسبوك ، وميكروسوفت إشترت نوكيا ، وأبو هشيمة شقلب ON بعد ما كانت لساويرس ، اللي عاوز أقوله إن ثقافة دمج الشركات أو شراء أسهم شركة منافسة في السوق بيعزز وجودك بشكل غير طبيعي ، وخصوصا لو طبقت الكلام ده علي Area صغيرة و وسعته فيما بعد ، وده بيكون أحد أهم عناصر نجاحك وسيطرتك علي السوق اللي بتشتغل فيه

9- التوســع علي الـ Social Media
لو إحنا إنهارده في 2017 وإنت لسه مالكش تواجد واضح ملموس علي Social media يبقي إنت حرفيا خسران أكتر مما تتخيل ، لأن الـ Social Media بقت أقرب لكونها الواقع الحقيقي مش الأفتراضي ، ولو مكانش وجودك عليها بشكل مؤثر وملموس ، مهما تعمل من توسعات ، هاتفضل مبهم بالنسبة لناس كتير ، وخليني أسألك سؤال :-
في الـ 3 سنين اللي فاتوا كام مرة سمعت عن إسم مكان أو براند أو شخص و أول حاجة عملتها دخلت دورت عليه علي فيسبوك !؟
إجابتك علي السؤال ده هي اللي هاتعرفك أهمية تواجدك علي Social Media بشكل منظم

النقطة الـ 10 دي سايبها ليك ، قول إنت أيه الخطوة اللي ممكن تعملها عشان تنقلك لمستوي أعلي في السوق اللي شغال فيه !؟