عارفين لعبة البيوت المبنية من ورق الكوتشينة ؟ شوفتوها قبل كده ؟، شوفتوا قد إيه عملية بناء نموذج كويس بياخد وقت و صبر و تركيز و دقة، لإن ممكن حركة واحدة غلط تكون كفيلة إنها تضيعلك كل مجهودك .


المشاريع نفس الكلام ممكن تكون بنيت مشروع أحلامك وزباينك راضيين عن منتجاتك وخدماتك ؛ يعني من الأخر الدنيا تمام .. صح ؟ الإجابه لأ غلط ؛ لأن ممكن خطوة واحدة غلط أو قرار خاطئ يرجعك لنقطة البداية .


حاولنا في البوست ده إننا نجمع أغلب الأخطاء اللي ممكن تتسبب في فشل مشروعك :


- معاملة الزباين كأرقام
عملائك أشخاص عندهم مشاعر فلو إتصرفت معاهم تصرف مش مناسب هيكون المردود إنتقاد شديد ليك وللبزنس بتاعك، في اللحظة اللي هتعامل فيها عملائك على إنهم مجرد ملفات في سجلاتك وقتها إنت بتحط مشروعك في سكة الفشل .


- تجاهل شكاوى العملاء
مهما كانت فكرتك إبداعية وعملية وتمويلك جيد وموظفينك مستواهم عالي ؛ لكن لو مجاش لمشروعك أي زباين فهو مشروع فاشل، علشان كده لازم تسمع وتهتم بشكاوى العملاء، لما تاخذ اللي بيقوله عملائك بجدية فده بيظهر ليهم إنك فعلا مهتم بيهم وده هيكسبك إحترامهم وبالتالي هتكسب زباين أوفياء هيستمروا بالتعامل معاك في المستقبل .


- إهمال الوقت
في عالم البيزنس "الوقت هو الفلوس"، وبقدر قيمة وقتك بتكون قيمة اللي هتكسبه، فلو عايز مشروعك يفشل فرتب أولوياتك بشكل غلط وخلي وقت كتير لحاجات عديمة القيمة ومتستخدمش أي وسائل لتنظيم الوقت .


- سوء إختيار الموظفين
فاكر لما قولنا في البداية إن المشاريع زي لعبة البيوت المبنية من ورق الكوتشينة، تخيل موظفينك هما ورق الكوتشينة، تخيل بقى إن واحدة من الأوراق دي أطرافها متنية أو مش بقوة الأوراق التانية .. إيه النتيجية ؟
أول حاجة بتلفت الإنتباه للشركات الكبرى هو طبيعة موظفيها، لو واحد قالك إنه شغال في شركة معينة هتعرف إن إمكانياته عالية بسبب المعايير الصارمة اللي بتتبعها الشركة دي .


- عدم التجديد
لو كنت عاوز مشروعك يدخل دايرة الركود قبل الإنهيار فممكن تكرر إستراتيجيات السنة اللي فاتت،عالم البيزنس زي القطر السريع المفروض تكون جواه ؛ مش واقف براه بتتفرج عليه وهو بيعدي قدام عنيك .
ركز على متابعة الكورسات وورش العمل والقراءة في مجالك، إستفيد من المحاضرات وحاول تتبادل الخبرات مع أشخاص في مجالك، لأن عالم البيزنس بيختلف السنة دي عن لسنة اللي فاتت ؛ وزباين السنة دي بتختلف إحتياجاتهم عن السنة اللي فاتت .


- قيادة جيش من الألات
لو رجعنا لمثال ورق الكوتشينة، مهما كانت أوراقك جودتها عالية فهايجلها وقت وتتهري والبيت هيقع ده لو مديتهاش العناية الكافيه، نفس الكلام .. عمالك بشر ومش ألالات ؛ من المهم إنك تعاملهم بالإحترام والتقدير نفسه اللي بتقدمه لزباينك، بالإضافة إنك تكافئهم لو قدموا عمل مميز وتشكر في مجهوداتهم وتخصص ليهم علاوات وامتيازات، كمان لازم تسمع مشاكلهم وتسعى إنك توفر مساحة إبداع ليهم .


- الكمية أهم من الجوده
التضحية بجودة المنتج ممكن توفر وقت أكبر ودا هيجيب زباين أكثر، لكن معنى كده إن زباينك مش هيرجعولك مرة أخرى، الزباين سريعو الملاحظة لما جودة الخدمة أو المنتج تقل،ممكن التركيز على الجودة ياخد وقت أطول لكن الزبائن هيرجعولك بشكل مستمر، وهيكونوا على إستعداد إنهم يدفعوا أكتر مقابل خدمة أفضل .
مثال على كده شركة شانال للملابس والعطور عمرك ما هتلاقيها بتغرق السوق، لكن بالتأكيد بتحقق اللي ما تحلمش بيه الشركات الصينية اللي غرضها إنها تغرق السوق بمنتجاتها .

المصدر: صفحة إعمل بيزنس على الفيسبوك