من القصص اللي ديما معجب بيها جدا لحكمه ربنا


الملياردير المصري محمد الفايد
شاب كان عنده ٢٤ سنه وكان اصغر واول مصري وكيل بواخر شحن اجنبيه وكان عنده أربع بواخر بتاعته ،
مره واحده يدخل عليه ناس يطردوه ويقولوله الشركه بتاعتك اتأممت واتفضل اتكل علي الله روح كل عيش في حته تانيه ،
يقوم يقرر أنه خارج من مصر ومش راجع تاني و يروح يشوف اكل عيشه في حته تانيه .
وقرر يسافر انجلترا يشوف هيعمل ايه و طبعا مفيش فلوس
المهم بدأ تاني علي قده هناك و فيه مركب من المراكب عطلت فراح دبي يشوفها ، دبي ساعتها اول مبتنزل بتروح تسلم علي الشيخ راشد نفسه ، الدنيا هاديه والبلد فاضيه .
الشيخ طلب منه يشوفله حد في انجلترا لما يسافر يبنيله ميناء لان كل السفن بتقف بعيد علي البحر والمكان استراتيجي .


وقاله لو نجحت هخليك تاخد ادارته ٢٥ سنه , طبعا مكنش محتاج يفكر و لا عارف هيعمل ايه لكن شطارته خلته يقوله اكتبلي ورقه فيها تفويض اني اتكلم باسمك وقد كان،
ليه هو واشمعني هو يطلب منه كده فده ربك ، وفعلا سافر و دور علي شركه انشاءات انجليزيه ولقي شركه قعد مع صاحبها وقلهم العرض وأنهم يقدروا ياخدوا تمن تنفيذ الميناء من نسبه في الاداره اللي هو هياخدها أو ياخدوا قروض علي اساس الاتفاق ويسددوه من أرباح التشغيل ، و من هنا الشركه وافقت والميناء اتنفذت وبنوا اربع ارصفه في ٦ شهور اللي هي سيادتك ميناء دبي من أكبر موانئ العالم دلوقتي .


الشيخ قاله انت وشك خير طلب منه يشوفله شركه تنقب علي البترول عشان لو فيه بترول هيقدروا ياخدوا قروض علي أساسها ،
وقد كان يسافر ويجيب شركه المانيه للابحاث تنقب علي البترول وتلاقي أن دبي فيها رصيد يساوي ٣٠٠ الف برميل يوميا ، عايمه علي البترول الشيخ قاله انت قدمك خير ومن ومن هنا قدروا ياخدوا مليارات علي أساسها بدأت بيها في بناء مولات وطرق ومدينه حديثه عشان تكون من احسن مدن العالم و كان السبب أن يبقي فيه مائه الف انجليزي يشتغلوا هناك في الفتره ديه هو محمد الفايد وهي ديه بدايه الإنجليز في دبي و تخيل اقتصاد انجلترا استفاد بسبب محمد الفايد قد ايه .


لو سألت نفسك اشمعني هو مالشيخ بيعدي عليه آلاف الشخصيات و اكيد يقدر يبعت حد من عنده ، لكن ربك ورزقه و أنه يعوضك خير خلي محمد الفايد هو اللي يقوم بالمهمة ديه ، ومن هنا تعرف أن مفيش حظ فيه توفيق من ربنا أنه يوفقك ويعوضك في المكان الصح والوقت الصح وان من توفيق ربنا انك تقدر تاخد الفرصه لما تجيلك وتستغلها بضمير وصدق في العمل.


ولازم تبقي متاكد أن رصيد المجهود واحد ومتسجل وأن وعد الله حق أن الله لا يضيع اجر من احسن عملا وده مع أي بني ادم واي دين لان ربنا ببساطه عادل .


نسأل الله ديما التوفيق واتقان العمل .