الشركات الناشئة فى الوطن العربى والعالم ككل فى زيادة مستمرة وفى منها شركات قدرت ترفع نسبة نموها وتطورها فى وقت قليل ويبقى ليها مكان فى السوق والمجال المتخصصة فيه. من ناحية تانية فى ناس كتير بتقلق وبتخاف من العمل فى شركة من الشركات الناشئة عشان كدة قررنا النهاردة نكلمكم عن 5 أسباب ممكن تخليكم تشتغلوا فى شركة Start Up.
1- المسئولية .. شغلك مع فريق عمل صغير بيديك مساحة كبيرة إنك تكون مسئول وبتنفذ رؤيتك بشكل يهدف لتطوير الشركة وخدمة طموحها ودة هيديك خبرة كبيرة مستقبلاً وقدرة أكبر على تحمل المسئولية.
2- المساهمة فى تشكيل ثقافة الشركة .. لما تشتغل فى شركة ناشئة وتساهم فى تأسيس ثقافتها دة هيكون مريح ليك أكتر لإن نظامها انت ساهمت فى وضعه وإخترت قواعده بنفسك وبكدة هتتفادى الصدامات اللى ممكن تكون ناتجة عن عدم تكيفك مع ثقافات الشركات الكبيرة.
3- فرصة التعلم .. العمل فى الشركات الناشئة فرصة كبيرة لإنك تتعلم وتكتسب خبرات جديدة وكمان فرصة للتجربة والخطأ ودة مش هيكون أمر مقبول فى الشركات الكبيرة واللى هتواجه فيها أزمة تقبُل أخطائك.
4- التأثير فى الناس .. أغلب الشركات الناشئة بتكون مُلهمة ومشجعة لكتير من الشباب انهم ياخدوا الخطوة ويشتغلوا فى شركات ناشئة أو يأسسوا مشاريعهم الخاصة واللى غالباً بتحاول انها تقدم تسهيلات حياتية اكتر او خدمة جديدة للمستهلك عشان تحل مشاكله وتلبى احتياجاته.
5- التدريب والتطوير .. هتستفاد دايما من عملية التدريب والتطوير المستمرة اللى بتوفرهالك الشركات الناشئة او بتساهم بشكل او بآخر فيها عشان تنمى قدراتك وترفع من مستوى أدائك.