هتكلم اليوم عن مشكلة بتواجهه الشركات وفرق العمل وهى مشكلة دوران الموظفين (Turnover) مشكلة او ماتسمع انها موجوده تعتقد انها اكيد مشكلة داخل فريق العمل او مشكلة فى ادارة الشركة بس معليش خلينا نناقش الموضوع من زاوية تانية وهاعتمد على نظرية من النظريات اللي درستها اثناء الماجستير عن السلوك التنظيمي وهي Maslow hierarchy of needs .

وجهة نظري ان مشكلة ال turnover ممكن يكون سببها بداية من عملية التوظيف نفسها والسبب ان مسئول التوظيف مياخدش فى الاعتبار نظريات ماسلو ويكون عنده مجموعة متطلبات فنية عايز يوفرها فى موظف وخلاص ونسي انه بيتعامل مع انسان مش الة.

نظرية ماسلو عن هرم الاحتياجات بتقول ان الانسان بيعدى على خمس مستويات بتبدء من قاعدة الهرم وهى الاحتياجات الاساسية زي السكن والاكل والهواء والمياه والنوم لما يحقق الشخص المتطلبات دية ينتقل للمستوى اللى بعده وهو انه يلبي الاحتياج للأمان والاستقرار و لما يفي بالمتطلبات دية ينتقل للمستوي اللى بعدة وهو استيفاء متطلبات العلاقات الاجتماعية زي الصداقة والارتباط العاطفي وخلافة . ولما يتحقق المستوي ده ينتقل للمستوي اللى بعده وهو تلبية متطلبات التأثير المجتمعي وانك تكون شخص ذو تقدير ومكانة مرموقة بين الناس واعلى مستوى وهو تحقيق الذات او بمعني ادق تمت تلبية كل متطلباتك وليس لديك اى احتياجات اساسية سوف تحقيق طموح معين او غاية معينه.

طيب ايه علاقة ده بعملية التوظيف من وجهة نظري ان لو خلال التوظيف تم عمل مقارنة بين الاحتياجات اللى الوظيفه بتلبيها للشخص اللى هيشغلها وبين مستوي الشخص فى هرم الاحتياجات هنقدر نعرف انه لما يشتغل هيكون راضي ولا لا وبالتالي هيستمر فى الوظيفه ولا لا لأن ببساطه لو نقلت شخص من مستوي اعلى فى الهرم ونزلته درجه هيكون غير راضي تمام .

على سبيل المثال موظف فى شركة عالمية كبيره بيحظي بمميزات تخليه فى المستوي الرابع بعدين يقرر ينقل شركة لسه جديده مثلا مع وعود بانها تبقى شركة كبيره وهويكون ذو مكانه مرموقه فيها هو فى الحقيقه بيدور على انه ينقل للمستوي الخامس وهو تحقيق الذات لأن لو الشركة اللى اتنقل عليها مفيش فيها نظام قوي هيبدء يقارن وقتها هيكتشف انه نزل درحه فى الهرم وقتها هيقرر يمشي.

مثال تاني موظف فى المستوي الثالث مثلا مرحلة الاستقرار الاسري وبعدين نقل على وظيفه فيها سفر وتنطيط وقتها هيحس انه نزل مستوي وهيكون غير راضي.

انت ممكن تسأل طيب هو ليه وافق من البداية ممكن مايكونش يعرف تفاصيل الوظيفه ومميزاتها وعيوبها بعدها يكتشف ان فى متطلبات عنده كان وظيفته السابقه بتلبيها الوظيفه الحاليه مش بتقدمها وقتها بيضطر يمشي.