الموضوع: خلاصة خبرة 15 سنة مقابلات وظيفية

بقالي ١٥ سنة باعمل interviews كتيرة وباعَيين شباب لسة متخرجين.
بشوف شباب كتير جداً أهاليهم صرفوا عليهم مئات الآلاف في تعليم جامعي وشهادات شكلها جامد وفي الآخر يطلع مالوش لازمة في الشغل وتانيين تعليمهم عادي ولكن الواحد منهم بعد سنتين يشيل شركات لوحده.
لو سألتوا أي حد بيعين عن طلباته حاتلاقوها صفات ثم مهارات وأخيراً شهادات.
الي وصلتله ان التعليم مش صرف فلوس على شهادات. بناء الشخصية هو الأهم.


علموا ولادكم يبقى عندهم رؤية مستقبلية وقدرة على التخطيط. علموهم يعرفوا ياخدوا قرارات كبيرة ويشيلوا المسئولية.


علموهم ان العلم وسيلة والشهادة قد تكون دليل على جودة العملية التعليمية ولكنها مش دايماً دليل على جودة صاحب الشهادة ومش هدف في حد ذاتها. فيه ناس بتقعد تتعلم طول عمرها خوفاً من مواجهة الحياة العملية.


علموهم يشتغلوا من صغرهم. يكسبوا ويخسروا ويتعبوا. لما يدخلوا الجامعة يشتغلوا ويصرفوا على نفسهم أو على الأقل يتحملوا جزء من مصاريفهم. دا غير مشاركتهم في مسئوليات البيت. فيه ناس وصلوا لسن الأربعين ومش عارفين يتحملوا المسئولية لإنهم ماتربوش عليها.


علموهم الفكر الريادي (Entrepreneurship). خلوهم يفكروا طول الوقت في تحسين كل حاجة حواليهم، يفكروا في مشاريع صغيرة ويبدأوا فيها. يحولوا أفكارهم بسرعة لمشروعات على أرض الواقع ومايعيشوش في الاحلام. ولو باظط يقوموا بسرعة ويحاولوا تاني.


علموهم ياخدوا قرارات. اشركوهم من طفولتهم في قرارات البيت وترتيب أولويات واحترموا رأيهم. شفت ناس في الشغل بيسألوا قبل ما يعملوا أي حاجة حتى لو الحاجة دي بيعملها بقالوا سنة. النوع دا مستقبله مسدود.


علموهم يقرروا مستقبلهم بعيد عن رأي الناس. مايدرسش الهندسة علشان اللقب ولا التسويق علشان cool ولا البرمجة علشان عليها طلب ولا ادارة الاعمال علشان اصحابه كلهم داخلينها ولا الطب علشان بابا عايز كدا. أسعد وأنجح ناس هما اللي بيعملوا اللي بيحبوه حتى لو مادخلوش جامعة.


علموهم يعلموا نفسهم، يدوروا على الانترنت يسألوا اللي حواليهم يشتروا كتب، بس المهم يطوروا نفسهم طول الوقت. احنا في زمن العلم فيه موجود في كل مكان وببلاش. الشهادات هي الي غالية.


علموهم التواصل مع الناس من صغرهم. مايخافوش من الناس ويكلموا أي حد بثقة. يعرفوا يوصلوا لهدفهم بسرعة وبالطريقة المناسبة للي بيكلموه.


علموهم الإلتزام في كل شيئ. في المواعيد والوعود. وخاصة الالتزام في إدارة التوقعات.


علموهم قوة الملاحظة واكتساب الخبرات من كل اللي حواليهم.


وأهم حاجة علموهم الحكمة. يعرفوا يبصوا للأمور من وجهة نظر غيرهم. ما يحكموش على حاجة بسطحية ويفصلوا مشاعرهم وخوفهم وأهواءهم ويكون عندهم مرونة شديدة لتغيير وجهة نظرهم علشان الاختيارات تطلع سليمة.


لو فيه حد بيعرف الحاجات دي حايكون حلم بالنسبة لأي مدير حتى لو ماعاهوش شهادة. وحايكبر بسرعة جداً في أي مكان.

Ahmed El Moualled

كلام جميل ورائع وصحيح.. جزاك الله خيرا.................

الكلام رائع جدا... ولكن الشهادة العلمية لها دور مهم جدا في بناء الشخصية إذا ما إجتمعت مع العزيمة الصادقة للعمل.. خبرة بدون شهادة تعتبر ناقصة لإن الشخص لا يستطيع أن يقف أمام بعض المشاكل التي تواجهه والتي تتطلب تدخل العلم في حلها مشاركة مع الخبرة.. بمعنى أن العلم والخبرة هما وجهان لعملة واحدة للنجاح.