١- ال HR اللي بينزل اعلانات توظيف بتاعته ومش بيكتب تفاصيل الوظيفة زى المهام الوظيفية J.D او ما يحددش المسمي الوظيفي بالظبط position ويكتفي بكتابه القسم زى مثلا مطلوب محاسب او مطلوب موظف HR ..الكلام دا مش صح ويدل ع عدم الاحترافية


2- ال HR اللي بيكتب ايملاته الشخصية عشان يستقبل عليها ال CVs وهو عندة ايميل شركة .. دا عدم احترافية مهما كانت الاسباب


3- ال HR اللي بيكلمك في التليفون عشان يستفسر منك علي كام حاجه Telephonic interview وما يتأكدش منك الأول انه معاد مناسب ليك ولا لا دا عدم احترافية او انك من نفسك تعتزر عشان انت ف مواصلات مثلا وتطلب منه يكلمك في وقت تانى وما يتصلش بيك عشان اتقمص ... الشركة دى تحمد ربنا انك ما اشتغلتش فيها


4- ال HR اللي هيقولك انى هبعتلك ميل بالتفاصيل زى العنوان وخلافة وما يبعتش ...دى عدم اهتمام من أولها هو نسيك بعد ما قفلت معاه علطول هيفتكرك اما تروحله الشركة وتقولوا انا عندى انترفيو النهاردة ????


5- ال HR اللي هيرجعنا ٨٠ سنه ورا ويقولك اكتب معايا العنوان بالظبط واكتب اسم الشخص اللي هتقبله واكتب اليوم والساعه والثانيه .. قولوا ياعم هو اختراع النت عندكم لسه ماجاش... ما تروحش طبعا لان الجواب باين من اوله


6- الابلكيشن بتاع الشركة لو بفلوس.. اطلع يا معلم علي القسم علطول بلغ لانهم نصابين .. اما لو الابلكيشن حاسه مافيهوش اى سؤال غير اللى ف الCV بتاعك يبقي دول حافظين مش فاهمين.. يعنى بلح ف HR knowledge


7- وصلت الشركة ف معاد interview الساعه مثلا ٢ ظهرا وفضلت مستنى ربع ساعه محدش قالك اسفين مثلا ع التأخير لايا كان السبب ..واستنيت ربع ساعه كمان ومحدش عبرك قوم اقف واقلهم انا احترمت معادى لكن انتوا ما احترمتهوش ..لو رد فعلهم كان بارد ومستغربين يبقي دول من مدرسه سيب الناس ملطوعه عشان نشوفهم تحت ضغط.. دول بقا تمشي علطول من عندهم وتدعلهم بالهدايه


8- دخلت interview ولاقيت واحد بيكلمك وهو مادد رجلة ع كرسي تانى او بيكلم وهو باصص ف ناحيه تانيه وساعات بيحرك الننى عليك بس .. الراجل اللي بيعملك المقابله دا لسه خارج من مستشفي امراض نفسيه بيزور بس الشركة وراجع تانى... اوعى تحس انه بيتقل من احترامك ف اى مكان مهما كان


9- لو سمعت صوت عالي فى المكتب او ف الدور اللي فيه ال HR بالذات والمدير فرحان بحنجرته واما بيمشي الناس كلها بتخاف دا بردو لسه عايش ف عصر الجاهليه ..خلى بالك دى مش مكان يتزعل عليه


10- الجمله الشهيرة هنبقي نرد علي حضرتك وطبعا محدش هيعبرك حتى برنه ...يبقي ما تزعلش علي مكان زى دا لانه لم يحترم وقتك وفلوسك اللي صرفتها عشان تجلهم


النصائح دى بالذات للي عاوز يشتغل في ادارة ال HR في شركة من الشركات دى ..اوعى تزعل انك ما اشتغلتش معاهم لان للاسف هتتعلم غلط

بقلم مصطفى سعيد