الموضوع: العمل فى "فريق عمل" ... الحل السحري لمشاكلنا

بداية أشكر القائمين على المنتدى اللى أول مره أتعرف بيه ...

أنا طبيب ... بدرس الجوده الشاملة فى الجامعة الامريكية فى القاهره ...

و بعشق مجال الجوده ...

و فى عشقى للمجال ده بحاول أنى ابسط موضوعات من الجوده لغير المهتمين بالجوده و الموارد البشريه ...

يمكن يسمع واحد منهم ... و ينفذ ... يتغير ... و نبقى كلنا استفدنا ....

و من هنا بدأت أشرح أدوات الجوده البسيطه فى احد المنتديات الطبيه المشهوره

بحاول افهم - بأسلوب بسيط على قد ما قدرت - للناس فكرة فرق العمل ....

طبعا هناك بعرضها للأستفاده ... انما هنا بعرضها للراى و المشوره

و انتظر الاراء ... هل أكمل المشروع .. و إيه الملاحظات عليه ... و المساعده ...

انا معتمد على كتب درستها فى الجامعة الامريكيه + كتاب Managment ل ستيفن روبنز ... و اكتر من 100 موقع ...

و دا نص الموضوع


الموضوع اللي جاى أتكلم فيه النهارده
تقدر تقول كده أن عدم وجوده هو السبب في كل اللي أحنا فيه ...
و لو قعدت فكرت فيه...
ممكن توصل إن اللي بيحصل حواليك حتى في غزه
سببه أننا بعاد جداااااااا عنه ....

هوضح لك قصدى...
أحنا عمالين بنتكلم عن التوحد و الوحده والعمل الجماعى
و الرأى الموحد اللى مش عارف هيقدر يعمل إيه كده

طيب ما أحنا على طول بنشوف وبنسمع أننا "مش بنعرف نشتغل في جماعه أصلا "
و أن "العرب ما أتعلموش يشتغلوا مع بعض ... "
و شوية كلام عن ((بيئة و شجرة العمل الجماعى اللي بتطرح بره لكن ما ينفعش تتزرع عندنا))

لدرجة أنى قريت لكاتب مره كلمة مش عارف أنساها ...
- رغم أنى ناسى أصلا الكاتب مين -
كان الموضوع عن (العرب و اليابان)
فى دول عربيه بدأت مع اليابان في نفس الوقت تقريبا مرحلة البناء ...
.. و كانت الفزوره ....طيب لييييييييييه؟
ليه اليابان دولة متقدمه .. والعرب زى ما أنت واخد بالك ..

و كان رأى الكاتب ببساطه
يابانى واحد = عمل
2 يابانيين = إنجاز
3 يابانيين = معجزة

عربى واحد = إجتهاد
2 عرب= جدال
3 عرب = كارثة

خلص كلام الراجل المحترم ده ...
و الأمثله على نجاح الفرد و عدم نجاح الفريق مفيش أكتر منها ..
و الى يغيظك أن نفس الناس دى لما تطلع بره ... تشتغل فى فرق عمل كويس جدا


كل الدنيا بتتكلم عن فوائد فريق العمل Team Work
و أهميته و ازاى بينجز الشغل و بيغير الدنيا
و بيخلى الحياه لونها بمبى و أنا جنبك و و أنت جنبى ....
لكن احنا تقريبا بنخاف نجرب ... بنخاف النجاح يتنسب لغيرنا ... بنخاف أننا نختلف
جايز علشان ما أتعلمناش إن الاختلاف شئ طبيعى وعادى و ساعات بيكون مطلوب كمان
ما تفهمش المشكله فين بالظبط؟؟

طيب سيبنا من المشكله و خلينا عمليين
السؤال اللي محدش بيتكلم عنه كتير .... هو (إزاى ؟؟؟)
يعنى إزاى الناس بتشتغل فى فريق ؟؟؟
و أشمعنى أحنا اللي مش بنعرف نعمله ؟؟ يعنى هو العيب في العرب؟؟؟ ...
المشكله في العربى اللي بنتكلم بيه ؟؟؟ نتكلم أنجليزى مع بعض يعنى ...
ما أكيد في طريقه ...
ولا علشان ما أتعلمناهوش ... طيب لو المسأله مسئلة تعليم ..بسيطة... نتعلمه ....

من هنا قررت أنى أتكلم و بالتفصيل
فى موضوع يجمع بين التنمية البشرية و الإدارة و الجوده
و هيكون عملي جدا و متكامل إن شاء الله

هنتكلم النهارده عن

فريق العمل ... TEAM WORK

يمكن ربنا يكرم واحد بس من اللي بيقرا يستفيد
و يوم ما يكون فرد في مجموعه يطبق و يحولها لفريق عمل ناجح نبقى كسبنا كتير


ندخل في الموضوع :

هنتكلم بالترتيب كده ... يعنى من أول معنى فريق عمل .... و تكوينه
مرورا بالخلاف و السيطره عليه... لحد ما يقولوا لبعض مع السلامه و نشوفكم على خير ...
بعد ما يكونوا أنجزوا الشغل طبعا ...

هبدا من المشاركه الجايه الجزء الأول وهنتكلم فيه عن :
يعنى إيه فريق عمل؟
وايه المراحل اللي بيمر بيها لحد ما ينجز شغله؟؟

تحياتى و مواصل معاكم لو ما صدعتوش

د. أحمد الشيخ

تسلم أناملك

جزاكم الله خيرآ على هذا الموضوع

أنا أعمل فى إدارة الأنشطة التطوعية وتكوين فرق العمل الجماعية

موضوعك مفيد جدآ ومرتب بشكل جميل وتنسيق عال

ننتظر تواصلك معنا عساك تكون بخير وتطمنا عنك إن شاء الله

وهل يمكن لنا أن نبدأ بمناقشة الأجزاء التى تعرضت إليها؟

مشاركة إيجابية ومفيدة جازك الله خير على هذا الموضوع و بساطة العرض و الذى من خلاله تم تبسيط المعنى و وصولة للعامة

شكرا علي الموضوع الشيق لكن اهم حاجه مش العمل في فرق عمل المهم هو النفس الصافيه غير الحاقده علي الاخرين يعني اوعي تترك في قلبك حقد علي احد او تزعل او تغضب من حد وهو ده احسن فريق عمل

مراحي يظهر لي لأنه لا يوجد خدمة الإعلام عن الرسائل والردود هنا
الموضوع رائع والدكتور احمد لم يرد على أي رد وأسلوبها جدا جدا عملي اتمنى من قلبي أن أجد بقية حلقاته في هذا الموضوع
للأسف لا يبدو أنه يوجد تواصل هنا أم ماذا يا جماعة