النتائج 1 إلى 1 من 1

الموضوع: ‏تلخيص البهاريز فى عمل السى فيز‬ - احمد النجار

  1. #1
    نبذه عن الكاتب
     
    البلد
    الصومال
    مجال العمل
    أعمال ادارية
    المشاركات
    4,342

    ‏تلخيص البهاريز فى عمل السى فيز‬ - احمد النجار

    ‏تلخيص البهاريز فى عمل السى فيز‬ - احمد النجار

    من باب انى متبهدل عمل أنترفيوهات لناس بقالى فترة فحابب انى أديه الخلاصة للناس من الواقع المؤلم اللى انا شايفه و خصوصا حبايبنا اللى متخرجيين جداد لعلهم ينتفعوا باللى شفته و جربته مع الناس و لو حاد عاوز يضيف على الكلام يتفضل ده اللى جه فى دماغى بدون ترتيب:


    1- متحطش صورتك...الصورة بتكون انطباع مبدأى "سواء جيد او سئ" و فى الحالتين مش واقعى فبلاش أفضل


    2- ركز على المهم فى السى فى...شهادة حلوة شركة كويسة كنت شغال فيها...المعلومات اللى تحس انها هتفيدك انك تشتغل أكتبها واضحة وبسيطة...خليها فى الأول


    3- مترغيش فى السى فى...كل ما يبقى صغير كل ما يبقى أحسن...متتوقعش ان فى وقت أقعد أقرأ كل سى فى حرف حرف


    4- و انا بأكلمك يا بيه علشان نحدد ميعاد الأنترفيو حاول تسهلها على متخنقنيش "أنا ناس قالتلى اصل انا عندى ميعاد رايح يوصل واحد صاحبة المطار و اللى مش عارف خايف تبقى المواصلات زحمة فعاوز يوم تانى" حاول تقبل الميعاد و أعمل المستحيل علشان تحضره و متعتذرش غير لظروف قهرية


    5- جميل انك تسأل عن ايه الأنترفيو و تفاصيل الشغلانة...بس متقوليش "أذاكر ايه" علشان الأنترفيو...مش امتحان ثانوية عامة هو.


    6- لو انت لسه متخرج متشغلش بالك قوى بالعلم اللى تعرفه..عارفين و الله انك ميح و يدوب لحقت تأخدلك كورسين فى الوقت الضايع علشان الشغل و هترمى تعب سنين الكلية فى الترعة...اللى يهمنا أكتر شخصية سيادتك بتعرف تكلم كويس ولا لأ...بتتوتر بسرعة ولا بتعرف تسيطر على نفسك...بتتعامل ازاى لما بتتزنق فى سؤال...انا ولا فارقة معى أجابتك فارقة معى أزاى بتجاوبها "حتى لو كانت غلط على فكرة"


    7- أتنيل ألبس بدلة أو قميص "بلاش نص كم" و بنطلون كلاسيك و بلاش الألوان العجيبة اللى يكرمك مش جاى تتقدم فى جوازة...من الأخر لبسك يبقى نضيف و مكوى و مهندم و خليك فى الألوان و الأشكال المحايدة اللى متديش انطباع عنك...طبعا بقى جو التيشرتات ميكى ماوس و الكوتشيات و الحاجات اللطيفة ديه بلاااااااش.


    8- فى واحد مرة بأقوله على مكان الشركة "هو كان من برة القاهرة" قالى بالنص "و ديه أركبلها ايه"...أركبلها توك توك يا حاج...أنا مالى تركب ايه...السؤال اللى يتسأل فى الحالة ديه...طيب ممكن العنوان بالتفصيل...طيب لو سمحت ممكن تبعتلى مكانه على خريطة جوجل...هتوصل لنفس النتيجة يعنى.


    9- لو ملتحى هذب دقنك قبل ما تيجى..مش ملتحى اتنيل أحلقها بلاش جو تامر حسنى ده اللى يكرمك و الدقن اللى نص منبتة ديه...


    10- لو مش عارف حاجة قول معرفش...بلاش تفتى...


    11- أنا مبقولش لحد فى الأنترفيو هو جاوب صح ولا لأ على الأسئلة اللى سألتها "الخاصة بالتكنيكال يعنى" و معرفش ده صح ولا لأ الصراحة بس لو سألنى بعد ما يخلص معنديش مشكلة اشرحهاله بالعكس بيحسسنى انه مهتم يتعلم...بس متعملهاش لمجرد انك عاوز تحسسنى انك مهتم "مش انك فعلا مهتم من جواك" علشان بتبان بسهولة و بتدى انطباع وحش.


    12- متحاولش تشتغل اللى قاعد معك و يبقى كل غرضك انك تجاوب الأجابة اللى هو عاوزها...بتبان قوى


    13- لو هتتأخر على الميعاد أتصل إعتذر...و حاول تروح بدرى علشان تأخد فرصتك كويس...اليوم مش بيبقى ليك انت بس...انا مثلا باعمل كل ساعة انترفيو اللى هتتأخره هيبقى من وقتك انت مش من وقتى و وقت بقية الناس اللى بتيجى فى ميعادها.


    14- لو كاتب حاجة فى السى فى فأفضلك انك تكون عارفها فعلا لو مش عارفها شيلها...أنا ممكن أسأل فى أى حاجة متفتكرش ان علشان الأنترفيو عن حاجة معينة و انت كاتب حاجة خزعبلية فى السى فى بتتمنظر بيها انى مش هأسأل فيها...البركة فى الحاج جوجل ممكن أسأل فى علم تصنيع صواريخ الفضاء لو تحب...


    15- و انت بتذاكر حاجة حاول تفهم الله يكرمك...أنا عارف ان مش ده اللى كان بيحصل فى ايام الكلية...و حولت دماغك و كل اهتمامتك لحفظ المعادلة أو الثوابت...أنسى...أوعى تحفظ اى حاجة...البركة فى جوجل لو عاوز تجيب اى معلومة...المهم تبقى فاهم...أفهم الحاجة شغالة ازاى...لو فهمت هتحفظها برده على فكرة بدون ما تقصد اصلا.


    16- و انت بتسمى الملف اللى فيه السى فى بتاعك بلاش تكتب كلمة سى فى و خلاص كدا...سميه بأسمك...بتفرق معى و انا بأقلب فيهم.


    17- السؤال الأخير...هو ليه المستوى فى النازل قوى كدا؟ هو ليه الناس مبقتش مهتمة تتطور من نفسها و تتعلم حاجات جديدة...مش بس تكنيكال...لو حاسس انك مش بتعرف تتكلم قدام ناس بتعملك انترفيو...بتككسف..بتتوتر بسهولة...بتتزنق و مبتعرفش تفلفص من المواقف الصعبة باقل الخساير...ليه؟!!!! الأنترنت مليان حاجات تعلمك ده كله...طور نفسك و أتعلم و متستناش حد يعلمك بمعلقة...لازم تتعب علشان تعوض المصيبة اللى بتحصل فيك طول فترة تعليمك...من الأخر لو انت خريج حكومة زى حالتنا و حالة ناس كتير من الشعب بتاعنا فأنت مش متعلم اى حاجة...ده ياريتهم مكنوش علموك و سابوك على فطرتك كان أحسن...محتاج تتعب قوى على نفسك علشان تزبط الحاجات ديه...أتعلم لغة يا حاج و اتقنها...أقرأ فى مجالك و شوف ايه الجديد فيه...متنمش الله يكرمك

    بقلم : أحمد النجار
    المصدر: http://goo.gl/jOSsBH
    التعديل الأخير تم بواسطة أبو عبد العزيز ; 19/11/2014 الساعة 00:05

  2. الأعضاء الذين قالوا شكراً لـ أبو عبد العزيز على المشاركة المفيدة:

    alsomman1397 (28/1/2015)

موضوعات ذات علاقة
اخبار اعجاز القرآن الكريم للدكتور زغلول النجار
بسم الله الرحمن الرحيم طبعا كلنا عارفين الدكتور زغلول النجار وانا النهاردة جبت الموقع الرسمى للدكتور وهنلاقى فيه كل حاجه عن الاعجاز العلمى للقرآن وبعض كتب... (مشاركات: 0)

مصطلحات قرآنية : وصلتني من الاخ محمد رجب النجار
مصطلحات قرآنية المصطلح التفسير 1 القُرآنُ هو كلامُ اللهِ تعالى وَوَحْيُهُ المُنَزَّلُ على خَاتَمِ أَنْبِيَائـِهِ محمدٍ صلى الله عليه وسلم المَكتُوبُ... (مشاركات: 0)

تلخيص كتاب (عش هانئا)
السعادة و الهناء : - حتى نعرف جوهر السعادة لا بد أن نعلم أن هنا فصلين للرواية الحياة الدنيا و هي الأقل شأناً و الأقصر و الآخرة و هي الأهم . - من استقام... (مشاركات: 4)

قصة النجار
كان هناك نجار تقدم به العمر، وطلب من رئيسه في العمل وصاحب المؤسسة أن يحيله على التقاعد ليعيش بقية عمره مع زوجته وأولاده. فرفض صاحب العمل طلب النجار ورغّبه... (مشاركات: 11)

الأستاذ الدكتور نبيل الحسينى عليوة النجار
السيد الأستاذ الدكتور/ نبيل الحسينى عليوة النجار عميد كلية التجارة - جامعة المنصورة البيانات الشخصية | الوظائف الحالية | الوظائف الإضافية التي... (مشاركات: 1)

أحدث المرفقات