الموضوع: العمل فى "فريق عمل" ... الحل السحري لمشاكلنا

بداية أشكر القائمين على المنتدى اللى أول مره أتعرف بيه ...

أنا طبيب ... بدرس الجوده الشاملة فى الجامعة الامريكية فى القاهره ...

و بعشق مجال الجوده ...

و فى عشقى للمجال ده بحاول أنى ابسط موضوعات من الجوده لغير المهتمين بالجوده و الموارد البشريه ...

يمكن يسمع واحد منهم ... و ينفذ ... يتغير ... و نبقى كلنا استفدنا ....

و من هنا بدأت أشرح أدوات الجوده البسيطه فى احد المنتديات الطبيه المشهوره

بحاول افهم - بأسلوب بسيط على قد ما قدرت - للناس فكرة فرق العمل ....

طبعا هناك بعرضها للأستفاده ... انما هنا بعرضها للراى و المشوره

و انتظر الاراء ... هل أكمل المشروع .. و إيه الملاحظات عليه ... و المساعده ...

انا معتمد على كتب درستها فى الجامعة الامريكيه + كتاب Managment ل ستيفن روبنز ... و اكتر من 100 موقع ...

و دا نص الموضوع


الموضوع اللي جاى أتكلم فيه النهارده
تقدر تقول كده أن عدم وجوده هو السبب في كل اللي أحنا فيه ...
و لو قعدت فكرت فيه...
ممكن توصل إن اللي بيحصل حواليك حتى في غزه
سببه أننا بعاد جداااااااا عنه ....

هوضح لك قصدى...
أحنا عمالين بنتكلم عن التوحد و الوحده والعمل الجماعى
و الرأى الموحد اللى مش عارف هيقدر يعمل إيه كده

طيب ما أحنا على طول بنشوف وبنسمع أننا "مش بنعرف نشتغل في جماعه أصلا "
و أن "العرب ما أتعلموش يشتغلوا مع بعض ... "
و شوية كلام عن ((بيئة و شجرة العمل الجماعى اللي بتطرح بره لكن ما ينفعش تتزرع عندنا))

لدرجة أنى قريت لكاتب مره كلمة مش عارف أنساها ...
- رغم أنى ناسى أصلا الكاتب مين -
كان الموضوع عن (العرب و اليابان)
فى دول عربيه بدأت مع اليابان في نفس الوقت تقريبا مرحلة البناء ...
.. و كانت الفزوره ....طيب لييييييييييه؟
ليه اليابان دولة متقدمه .. والعرب زى ما أنت واخد بالك ..

و كان رأى الكاتب ببساطه
يابانى واحد = عمل
2 يابانيين = إنجاز
3 يابانيين = معجزة

عربى واحد = إجتهاد
2 عرب= جدال
3 عرب = كارثة

خلص كلام الراجل المحترم ده ...
و الأمثله على نجاح الفرد و عدم نجاح الفريق مفيش أكتر منها ..
و الى يغيظك أن نفس الناس دى لما تطلع بره ... تشتغل فى فرق عمل كويس جدا


كل الدنيا بتتكلم عن فوائد فريق العمل Team Work
و أهميته و ازاى بينجز الشغل و بيغير الدنيا
و بيخلى الحياه لونها بمبى و أنا جنبك و و أنت جنبى ....
لكن احنا تقريبا بنخاف نجرب ... بنخاف النجاح يتنسب لغيرنا ... بنخاف أننا نختلف
جايز علشان ما أتعلمناش إن الاختلاف شئ طبيعى وعادى و ساعات بيكون مطلوب كمان
ما تفهمش المشكله فين بالظبط؟؟

طيب سيبنا من المشكله و خلينا عمليين
السؤال اللي محدش بيتكلم عنه كتير .... هو (إزاى ؟؟؟)
يعنى إزاى الناس بتشتغل فى فريق ؟؟؟
و أشمعنى أحنا اللي مش بنعرف نعمله ؟؟ يعنى هو العيب في العرب؟؟؟ ...
المشكله في العربى اللي بنتكلم بيه ؟؟؟ نتكلم أنجليزى مع بعض يعنى ...
ما أكيد في طريقه ...
ولا علشان ما أتعلمناهوش ... طيب لو المسأله مسئلة تعليم ..بسيطة... نتعلمه ....

من هنا قررت أنى أتكلم و بالتفصيل
فى موضوع يجمع بين التنمية البشرية و الإدارة و الجوده
و هيكون عملي جدا و متكامل إن شاء الله

هنتكلم النهارده عن

فريق العمل ... TEAM WORK

يمكن ربنا يكرم واحد بس من اللي بيقرا يستفيد
و يوم ما يكون فرد في مجموعه يطبق و يحولها لفريق عمل ناجح نبقى كسبنا كتير


ندخل في الموضوع :

هنتكلم بالترتيب كده ... يعنى من أول معنى فريق عمل .... و تكوينه
مرورا بالخلاف و السيطره عليه... لحد ما يقولوا لبعض مع السلامه و نشوفكم على خير ...
بعد ما يكونوا أنجزوا الشغل طبعا ...

هبدا من المشاركه الجايه الجزء الأول وهنتكلم فيه عن :
يعنى إيه فريق عمل؟
وايه المراحل اللي بيمر بيها لحد ما ينجز شغله؟؟

تحياتى و مواصل معاكم لو ما صدعتوش

نبدا بسم الله

الجزء الأول:

يعنى إيه فريق عمل؟
وايه المراحل اللي بيمر بيها لحد ما ينجز شغله؟؟

الأول نفرق بين حاجتين ... مجموعه و فريق عمل ...

المجموعه Group
يعنى اى عدد من الناس أتجمع بأى طريقه ... لكن من غير هدف محدد بيشتغلوا كلهم علشان يحققوه ...

فريق العمل Team work
زى ما أنتوا واخدين بالكم هما كلمتين فريق + عمل... .. و التعريف في الكلمه التانيه ((العمل))
يعنى مجموعه لكن في مهمه محدده و هدف واحد
كلهم بيتعاونوا و بيكملوا بعض علشان يوصلوا للهدف ده

عرفنا الفرق خلاص ... و حسيتوا زيى اننا للأسف بنتجمع كمجموعات مش كفرق عمل

طيب

إيه هى مراحل نمو فريق العمل ...

أكبر غلط أنك تتوقع أن من أول لحظه الفريق هيطلع نتائج
أو أنك تفترض ان مدام الشغل ب حسن نيةهتطلع نتائج...
على العكس في حاجات كتير بتتعمل بـ "حسن نيه" بتبوظ الدنيا
و يا سلام بقى لما يبدأ الفريق يختلف ...
معظم الناس بتستسلم بدرى و الراجل الكبير كلامه يمشى و خلصنا ...
يمكن علشان ما يعرفوش أن طبيعى أنهم يختلفوا
وعلشان تتأكدوا أنه الأختلاف طبيعى ...
تعالوا نفهم مراحل نمو فريق العمل .. بيبدأ ازاى و بيمشى ازاى


المراحل الخمسه لنمو فريق العمل

سنة 1965 عرف عالم أسمه بروس توكمان Bruce Tuckman
المراحل اللي بيمر بيها أى فريق في شغلهم مع بعض ... ((خصوصا لو فريق العمل ده عدده صغير)) ...
و ليه نموذج مشهور جدا بأسمه وساعات تلاقيه بأسم FSNP Pattern

• التكوين Forming

• التصارع Storming

• التوافق Norming

• الأداء Performing

(بعد كده-سنة 77- توكمان ضاف مرحله خامسه أسمها Adjourning
تقدر تقول أنها مرحلة أنتهاء العمل)

تعالى نمشى معاهم بسرعه
علشان لازم فريقك كله قبل ما يبدا شغل يفهم الدنيا هتمشى إزاى :

• المرحلة الأولى التكوين Forming

أول ما أى فريق عمل بيبدأ ...بيتعرفوا على بعض ...(اهلا فلان بيه... منورفلان بيه)
و إيه الهدف من وجودهم هنا ...
وطبيعى أن كل واحد بيحاول يستكشف حدوده إيه ؟ ...
وطبيعى أن كل واحد بيبقى لسه محتفظ بشخصيته الخاصه بيه
(لسه فرد مش جزء من مجموعه)
ولو حصل خلاف يبصوا لقائد الفريق مستنين قراره...
ما بيفكروش يتناقشوا مع بعض
كل واحد حاسس أنه هو و القائد بس اللي قاعدين
مش عارف يتواصل مع اللى حواليه

وظيفة القائد هنا ...
توضيح المهمه .... والتوجيه مش القرارات
تعريف الناس ببعض
وليه أختاروا كل واحد منهم
الأفضل كمان أنه يشرح لهم المراحل اللى بنشرحها دى
علشان يفهمهم هما كمان هيمشوا ازاى

• المرحلة الثانية التصارع Storming

دى أصعب مرحلة ... علشان الناس بتختلف مع بعض
لكنها مرحلة أساسيه علشان الفريق يكمل و يوصل لنتائج
–لكن اللي أحنا متعودين عليه اننا بنقف هنا - طالما فى خلاف -
و القائد اللي ماسك الموضوع ياخد قراره
بعد ما كل اللي قاعدين يكونوا خلصوا الشاى بتاعهم-
لكن لازم الناس تفهم إن الاختلاف ده طبيعى وعادى و ساعات بيكون مطلوب كمان

الطبيعى أن المرحلة دى بتبدا لما كل واحد بيفهم حجم المطلوب ..
ويحس أن الموضوع كبير مش بسيط ..
ويبدأ يطرح وجهة نظره
ولأنهم عايزين الفريق ينجح - بس من غير خبره – تبدأ الاعراض العجيبه تظهر ...
كل واحد متمسك برأيه اللي وصل له من خبراته قبل كده ...
بغض النظر عن اى حد تانى معاه ...
و طبعا بيعتبر إن أى إنتقاد لرأيه = إعتداء على شخصيته
كده أكيد هما بيتناطحوا مش بيشتغلوا ...

هنا بقى بيحصل تضييع الوقت و التجريح في بعض و تضييع مجهود الفريق ...
و تبدا الناس تحمل مسئولية المشكله اللي بيناقشوها على اى حد من غير أى دليل ...

المفترض هنا القائد يوجه فريقه و يشجعه جدااااا أنه يشارك و يكمل مع بعضه ...
ويفهمهم أن الخلاف ده طبيعى
علشان يخلى الصراع ده يعلى بالفريق لهدفه ما يعطلوش ..
ولازم يكون القائد صبوووووور
و يتجنب أنه يصدر أحكام علشان الناس ما تتكسفش تتكلم
و بنحاول في المرحله دى – بمجموعه من أدوات الجودة هنقولها في وقتها-
نخلى كل واحد يطلع اللي جواه ... كل الافكار- من غير ما نحجر على رأى حد-
و نخليهم يقللوا اللوم العشوائى و يركزوا على الحلول


الدخول للمرحله الجايه- من عدمه- مترتب على هل أنت مشيت في المرحلة دي صح ؟؟؟
هل قدرت تسمع كل فكره من كل واحد ؟...
و تحسس كل واحد بأهمية رايه؟...
و تحسسهم أن صوت الفريق فوق صوت الفرد؟...
و تشجعهم و تهتم بتشجيع أقل واحد فيهم بيتكلم؟...

لو قدرت تنفذ كل اللى فات ... هنا تبدأ

• المرحلة الثالثة مرحلة التوافق Norming..

فى المرحله دى بتبدا الثقه المتبادله ...
الناس بتسمع بعض أكتر..
بيركزوا على الهدف
و بيبقوا أكتر أستعداد للتفاهم ...
و يقبلوا ادوارهم ... و قواعد عمل الفريق
وهنا يبدأ تحليل كل الاسباب علشان توصل للأسباب الرئيسية
– ودى ليها مجموعه تانيه من الادوات ليها وقتها-


دور القائد هنا بتبقى قبادة متفاعله ...
بتشجع و بتشارك و تسمع و تسيب الاعضاء ياخدوا قراراتهم كمان

نوصل لمسك الختام ...

• المرحلة الرابعة مرحلة الأداء ..Performing

بعد كده و مع استمرار الفريق ... يبدأوا يوصلوا للتناغم و النتائج تطلع ...
و شغلهم يكمل بعضه و يحبوا الشغل
و يدوب الفرد فى الفريق
و الاداء – أخيرا- يزيد و الخلاف يقل ...
وحتى لو ظهر يعرفوا يتغلبوا عليه


نقطة مهمه
مفيش حدود بين المراحل ...
تقدر تقول أنها دائره بتكمل بعضها
وارد جدا أن الفريق يرجع تانى للمرحلة التانيه بعد ما وصل للرابعه ...
لكن طول ما انتوا مسيطرين على الوضع ... الشغل بيكمل ...
وساعاتها لما يكملوا يسموها إعادة التوافق Renorming



باقى أنك تعرف
أن الفرق المحترفه -اللى أشتغلت مع بعض كتير-
ممكن تبدا من المرحله الثالثه على طول(التوافق)
لكن أنك تتوقع من اى فريق أى كان جديد ولا قديم انه يبدأ بالاداء ...
فده مجرد تسرع هيودى الفريق ورا الشمس



كان فى مرحلة خامسه صح ... Adjourning
سيبك منها ...
دى مرحلة ان الفريق بيخلص الشغل و بيمشى
"حتى فى ناس بتسميها مرحلة الحداد mourning "
المفروض أننا فى المرحلة دي نحتفل ان المهمه خلصت



ونحتفل كمان أن الجزء الاولانى – الطويل ده- خلص



أنا عارف إن الحكايه نظرى المره دى بس كان لازم كده
علشان نبقى فهمنا أحنا بنتكلم على إيه أصلا ....
و فهمنا فريق العمل بيكبر إزاى


هنكمل فى الجزء التانى -بأذن الله- هنتكلم فيه عن
تكوين فريق عالى الاداء..
بناء الثقة ...
قواعد الفريق ...
علامات الخطر ...

إيه رايكم أكمل ؟ ولا حتى دى كمان مش هنصل فيها لرأى جماعي ؟؟؟
----------------------------------------------------------
أنتهى الجزء الاول و بانتظار ارائكم

كلام جميل جداً أستاذ أحمد، و نتطلع لقراءة الجزء الثاني على أحر من الجمر

شكراً لك على وقتك الذي استثمرته في هذا المقال

ما أروع ما كتبت يا أخ أحمد بارك الله فيك ولا شك عندي في أن لك الأجر والثواب الكبير من الله

ونحن في انتظار الجزء الثاني في أقرب فرصة

لا حقيقى برافوا عليكى افاداك الله كما افادتنا معلومات رائعه

د/ احمد الشيخ اشكرك علي هذا المقال
ممكن ترسل لي علي الخاص
اريد التعرف عليك وتبادل الخبرات معك
جزاك الله خيرا

الله يفتح عليك يا ابوحميد
بجد هو ده الشغل ولا بلاش
لكن فيين الباقى يا دكتور ؟؟
متبخلش على أخواتك ....
تحياتى

شكراً على هذا الطرح ولكن الجزء الثاني هل سيكون شيق مثل الجزء الأول

جزاكم الله خيرا يا دكتور احمد على الموضوع الأكثر من رائع,بس فين باقيته؟؟!!
انت بتتقل علينا ولا ايه؟؟ياللا يا عم كمل بقه بقيت الموضوع بلييييييييييز

والله شيئ خطير ونحن بنستنا منك اكتر واكتر
والله يعطيك العافية يادكتور أحمد

nice really nice work i i'm really get the conclusion from it
thnx

جزاك الله خيراً على هذه المعلومات القيمة والبسيطة رغم كبر الموضوع

[b]الاخ الفاضل د/ احمد الشيخ
كلام جميل اللى قلته ولكن لى تعليق على نقطتين:
الاولى: ليه اليابان اتقدمت واحنا لا؟
النهضة ابتدأت فى مصر على عهد محمد على ولكنه حينما خرج الى خارج حدود مصر ابتدأفى تهديد الدول الاوربية وهنا تحالفت عليه وحطمتة
ووضعت مصر تحت الميكروسكوب............... مصر هى مفتاح التطور فى المنطقة العربية وهى القاطرة التى تجر من ورائها الدول العربية فى منظومة التطوير..........علشان كده العين عليها باستمرار..... مصر موش لازم تقف على رجليها ابدا علشان موضوع محمد على لايتكرر مرة تانية.........هى دى المأساة اللى احنا مع الاسف موش متنبهين اليها.
الثانية:فريق العمل!!!!!!!!!
هذه الروح يجب ان نغذيها من خلال البحث والفحص فى تراثنا الثقافى والتاريخى والا نخلع انفسنا من ترابنا الوطنى لان المسألة دى ماشية بتخطيط منظم على مستوى مصر والدول العربية والله اعلم حتوصلنا فين؟
ممكن تقولى المغزى من "يد الله مع الجماعة" أو" صلاة الجماعة أفضل ب27 درجة عن صلاة الفرد"......... اننا فى حاجة قصوى للبحث فى الذات العربية وتراثها.......لكى نخرج الى العالم وجذورنا ممتدة الى أعمق أعماق أراضينا فلا نتحرك مرة تبعا لاهواء الشرق ومرة تبعا لاهواء الغرب.
أحييك على مجهودك الرائع

موضوع حلو
ولكن لاسف احنا فى مصر نفتقد روح فريق العمل وده ليه اسباب اقتصادية ونفسيه
ولاسف ديه مشكلتى انا مش ديما بشتغل ضمن فريق عمل وده ليه اضرارة

شكرا على الموضوع الحلو
بس لاسف احنا فى مصر نفتقد لروح فريق العمل وده راجع لعدم الايمان بحق العمل وان العمل عباده وايضاَ لاسباب اقتصاديه ونفسيه ولكن ليس من المفروض ان نعلق اخطائنا على شماعة الظروف الاقتصادية والنفسية وللاسف انا اعانى من مشكلة فريق العمل لانى شخصيه قياديه فى عملى وانظر الى المصلحة العامة ولكن لاسف هناك بعض الانماط تنظر الى المرتب اخر الشهر ولا تنظر الى انتاجها فى العمل وعائد النجاح العائد منه اتمنى من الله ان نعمل بما امر به الله سبحانه وتعالى كفريق دائما ونتعلم من الغرب حب العمل .
شكرا

طيب أنا عندى سؤال:
ليه المصرىبيشتغل خارج بلده بكفاءة 99% وداخل بلده 33% ؟
يعنى ليه بياخد جايزة نوبل فى الفيمتو ثانية وداخل مصر بيستورد فانوس رمضان من الصين

استاذ على
حتى المصري خارج بلده مبقاش مطلوب لان بقه فى الهنود والفلبين ودول بيشتغلو اكتر وبراتب اقل
بجد يا ريت حد خبير فى الموارد البشرية يقولنا الفرعون المصري ماله هل هو كسلان اصلا وديه طبيعته ولا ايه ؟؟؟؟؟؟؟؟؟
يا ريت حد يجاوب

شكرا على المعلومات المفيدة وإلى الأمام ..........

إختر معاونيك أسوداً واصبر على سياستهم

موضوع مهم و مفيد بارك الله فيك سيدي الكريم

الموضوع كتير حلو وبتمنى تتحفنا بشغلات عملية أكتر

شكرا على الموضوع القيم الذي قدمته و الذي إذا عملنا يكون نقطة قوة العرب . شكرا مرة أخرى واصل تألقك

مقدمة ممتازة للموضوع وشرح متكامل و بسيط سهل للهضم مشكوووووووووووووووووووووو وووور

جزاك الله خيرا بس الاستمرار هو حل

نستمر الله يغفر لك وويفوقك كلام رائع