الموضوع: محتاجة مساعدة ورأي

مبدأياً كل سنة وانتم بخير
موضوعي طويل نوعا ومعقد بس فعلا محتاجة مساعدة .. انا خريجة معهد الخدمة الاجتماعية بتقدير مقبول لسنة 2011 .. انتظرت السنة ديه اني اسجل في التوظيف الخاص بمديرية التربية والتعليم بس لاقيت حاجتين مطلوبين .. اولا التقدير لا يقل عن جيد ثانيا اني اخد دبلومة تربوي .. بالنسبة لدبلومة تربوي انا اصلا كنت ناوية اخدها علشان تمهد ليا اني بعد كده اعمل دراسات عليا عن التوحد مثلا او مجال التأهيل المهني.. الخ واحسن من مستقبلي خصوصا اني باصة اني اشتغل بره مصر
طبعا انا حسيت باحباط كبير لان التقدير كان حاجز كبير ليا في اني اشتغل في مجال بحبه

على اي حال في الفترة اللي فاتت كلها كنت بدور في الصحف على شغل هنا وبره في اي دولة عربية وببعت السي في بتاعي لكل ايميل موجود طالب اخصائيين وبتكلم طبعا لو كان الشغل في مصر بس للاسف مافيش رودود على اميلاتي لان معظم الشغل طالبين خبرة وده شيء يجنن لان اكيد في ناس كتيرة زيي اول مرة تشتغل طب هاجيب خبرة منين وانا محتاجة شغل الاول علشان الخبرة
حقيقي محبطة جدا ومش عارفة اغير مجالي دلوقتي ولا اكمل دبلومة تربوي ودراسات عليا في نفس مجالي ولا اعمل ايه .. حاسة اني بجد في مفترق طريق واي خطوة غلط هاخدها هتأثر على حياتي العملية بشكل كبير على الارجح للفشل
وفي نفس الوقت مش عايزة اشتغل في اي حاجة لمجرد الشغل بس انا فعلا زهقت من القعاد في البيت بدون اي شغل وزهقت من احساس ان حياتي العملية بتمر من قدام عيني على الفاضي

السبب الرئيسي اني بكتب هنا في المنتدى اني لاقيت توظيف كتير للاتش ار في رحلة بحثي عن وظايف على عكس توظيف الخدمة الاجتماعية اللي كانت بتطلع عيني عقبال ما الاقي اعلانات فيها طلب.. فمحتاجة اعرف لو قررت اغير مجالي دلوقتي ايه الشهادات المطلوبة والاماكن الكويسة اللي اقدم فيها علشان ادرس .. وهل تنصحوني بالتغيير ده خصوصا ان برده للاسف وظائف التنمية البشرية معظمها كانت مطلوب فيها خبرة كالعادة وده مخوفني اني ادرس واضيع وقت وجهد وفي الاخر برده ارجع لنفس النقطة اللي انا فيها دلوقتي وكأنك يابوزيد ما غزيت!
اسفة للاطالة وفي انتظار ردودكم
تحياتي

الزميلة الفاضلة،

كل عام أنتي والجميع بخير.

عليك بإتقان اللغة الانجليزية واللغات الأخرى ومهارات الحاسب الآلي، فهما مفتاح 90% من الوظائف.

محمد يسري

بسم الله و الصاة و السلام على رسول الله
انصحك متشتغليش في مجال الا لو كنتي بتحبي المجال دة لان بدون حب للعمل مش هيكون في حماس مش هيكون في اتقان في العمل مش هيكون في نجاح
توكلي على الله و اتعلمي على قد ما تقدري و ان شاء الله ربنا هيرزقك بالخير بس حددي هدفك الاول