حلم العمر لزيارة باريس و ديزني لاند بأقل من 5000 جنيه ‏انت حتهزر ؟؟
لأ و الله حقيقي مش هزار , تصدق أن ممكن رحلة لباريس متكلفش أكتر من 5000 جنيه, شامله طيرانك و سكنك و رحلاتك و انتقالاتك و تزور كمان كل معالم باريس.
لو حبيت انك تختصر أوروبا في مدينه واحده , أعتقد مش حتلاقي أفضل من باريس مدينة السحر و الجمال و التاريخ ,زيارة باريس حلم لكل محب للسفر و الترحال , تجربة انك تشوف برج ايفل لأول مرة و تزور متحف اللوفر و تمشي في شارع الشانزليزيه و ترجع لطفولتك في ديزني لاند.
حلو أوي بس بردو ازاي كل ده يتم ب 5000 جنيه بس ؟
أسرار السفر الى باريس بأقل التكاليف :
حنتفق مبدئيا أن بما اننا طالعين رحلة بميزانيه محدودة , فحنستغنى عن شوية رفاهيات زي الفنادق الفخمة أو ركوب التكاسي و الأكل في مطاعم الخمس نجوم, و ممكن أوي بما أننا طالعين هدفنا الأساسي هو الفسحه فنسكن في هوستل و نركب متروهات و نمشي كتير طحن و أخرنا ناكل في ماكدونالدز
تذكرة السفر: طبعا و هي الجزء الأغلى في الرحلة , لك أن تعلم ان تذكرة السفر لباريس ممكن تشتريها بسعر لا يتجاوز 2400 جنيه على الخطوط الايطاليه ذهاب و عودة الى باريس.
السكن : طبعا زي ما تعودنا بما اننا شباب مافيش مانع نسكن في هوستل ( لو كنت لوحدك أو فردين ) انما لو كنتوا 4 افراد فالأحسن تاخدوا غرفة رباعيه و حيكون سعرها ممتاز لما تتقسم على أربعه . سعر السرير في هوستل معقول زي مثلا AIJ Paris لمدة 5 ليالي لا تزيد عن 900 جنيه و شامل الافطار كمان, ده موقعه كويس أوي لأنه قريب من المترو كمان.
طيب باريس مدينة كبيرة أوي و فيها معالم كتير جدا ازاي حقدر أدخل كل المعالم دي بالسعر ده ؟
أسعار المتاحف في باريس مش رخيصة , غير انك ممكن تقف في دور لمدة ساعتين علشان تحجز تذكرة بس , طيب ايه رأيك في كارت يدخلك حوالي 60 متحف و معلم سياحي في باريس لمدة 4 أيام و كل ده بمبلغ 500 جنيه فقط . ( ده طبعا لمحبين المتاحف و المزارات ) و نصيحه بما أنك في باريس متفوتش حاجه و ادخل كل حاجه ‏, و لكن نظم برنامج رحلتك كويس . الكارت اسمه museum pass و ممكن تشتريه اون لاين من الموقع ده http://en.parismuseumpass.com/
بس أهم معالم اللي أنصحك ماتفوتهاش بالكارت ده : متحف اللوفر , قوس النصر , متحف اورساي , قصر فرساي , كنيسة نوتردام , البانثيون . سان شيبيل و طبعا فيه متاحف و معالم تانيه كتير بس دول أهمهم و تقدر تدخلهم اي عدد من المرات و بدون ما تقف في اي طوابير و مجانا بكارت museum pass , المتاحف في باريس أقل ما يقال عليها انها ابهااااار , من ساعة ما تدخل تبقى مش عارف تبص فين و لا فين , على الأرض و لا السقف و لا الحيطان و لا حتى الناس الماشيين ‏, بس أحلى متحفين هما اللوفر طبعا و اورساي ( خلي بالك أغلب التماثيل عريانين ملط هههههه )
طيب ايه رأيك في جولة في كل باريس لمدة يوم كامل في باص سياحي و يخليك تمر على كل المعالم السياحية و تقدر تنزل و تطلع طول اليوم بنفس التذكرة , و كمان تاخد جولة نهريه في نهر السين علشان تتفرج على معالم باريس من النهر !؟ , بعد بحث طويل لاقيت أرخص سعر على الشركة دي http://www.foxity.com/ و سعر الباص طول اليوم و الرحلة النهرية ب 270 جنيه بس . و طبعا بردو تحجزها اون لاين , متنساش تتصور كتير فحت عند برج ايفل و عند كل معلم سياحي , لأن بجد صور الرحلة دي بتكون أحلى ذكريات في المستقبل
برج ايفل : لو حتطلع البرج فلازم تعرف ان البرج 3 أدوار , الدور الأول و التاني ممكن تطلعه على السلم و ده يكلفك 7 يورو و تحجزه أون لاين ( و الاختيار ده هو الأنسب و الأفضل لأحسن منظر من البرج , و أتعب نفسك شويه و أطلع على السلم ‏) و لو انت مش غاوي بهدله تقدر تطلعه في الاسانسير و يكلفك 11 يورو , و الدور التالت ( قمة البرج ) و ده بيتطلع بالاسانسير بسعر 17 يورو ( و للاسف دخول البرج غير مشمول في كارت المتاحف ) لكن نصيحه لو حتطلع قوس النصر ( مشمول في كارت المتاحف مجانا ) مالوش لازمه تطلع برج ايفيل , و فيه معلومة حلوة : برج ايفل بينور الساعه 10 بليل بالظبط و الأضواء البراقه بتشتغل لمدة 5 دقائق بداية كل أول ساعه و أحلى منظر لبرج ايفيل بليل لهواة التصوير من Trocadero و دي المنطقة بين Palais de Chaillot الى Pont d’Iéna و دي أمام برج ايفيل بالظبط
الانتقالات : أحسن وسيلة انتقالات في باريس هي المترو و شبكة المترو ضخمه جدا و مغطيه تقريبا كل مكان. نصيحه هامه : أشتري تذكرة t+ ودي بتكون 10 تذاكر مترو و سعرها 10 يورو , لأن سعر التذكرة الواحده 1.8 يورو , يعني حتوفر تقريبا 8 يورو .
باريس فيها مطارين : مطارشارل ديجول, و مطار أورلي , لو حتنزل على مطار شارل ديجول أرخص وسيلة مواصلات لوسط باريس هو باص رقم 351 و ده سعره 6 يورو , و لو حتنزل على مطار أورلي أنسب وسيله لوسط باريس هو orlybus و ده سعره 7,7 يورو, و مطار أورلي أقرب لباريس من شارل ديجول .
أجمل حاجه تعرف بيها معلومات و قصص عن باريس أنك تاخد جولة مع مرشد في شوارع باريس لمدة 3 ساعات يحكيلك فيها عن تاريخ و قصص و أسرار باريس , و تصدق أنك ممكن تعمل كل ده ببلاش . كل اللي عليم تدخل على الموقع ده و تختار التاريخ اللي يناسبك و تحجز معاهم http://www.newparistours.com , دي رحلات مجانيه مع مرشد سياحي متخصص في باريس , ( طبعا هما بيعتمدوا على البقشيش في اخر الرحلة و 5 يورو كويس أوي كتقدير لتعب الراجل )
طبعا رحلة باريس متكملش بدون زيارة أحلى مدينه ألعاب في العالم ( ديزني لاند ) , بجد تجربة العمر , حتحس و أنت فيها أنك رجعت 20 سنه لورا , حتعيش جوا كل قصص ديزني اللي اتفرجنا عليها و احنا اطفال , ملهاش غير وصف واحد ابهااااااااار للكبار و الصغار . ( حعمل بوست خاص عن أسرار ديزني لاند باريس لأن موضوعها كبير أوي و ازاي تستفاد أكبر استفاده و تركب أكبر كمية العاب خلال زيارتك لديزني لاند ) , معلومه مهمه : لازم تشتري تذكرة ديزني لاند اون لاين لأن سعرها اون لاين بحوالي = 650 جنيه و لكنها تستحق الصراحه , و سعرها من على البوابة 1100 جنيه .
نقطة مهمه بخصوص الأكل : الأكل الصراحه غالي , و أنصحكم بالابتعاد عن المطاعم العربية لأنهم استغلالين جدا و غاليين على الفاضي , بالنسبه لنا كان ماكدونالدز هو الأنسب و الأرخص و كان سعر الوجبه في حدود 6 يورو. و حاول دايما تشتري سناكس من السوبر ماركت و تخليها معاك في الشنطه زي البسكوتات و العصاير و الشيبسي و كده . و طبعا متنساش تجرب المخبوزات الفرنسيه و الماكريل
تنظيم خط سير الرحلة : قبل السفر لازم تنظم خط سيرك كويس جدا و تتأكد من مواعيد عمل المتاحف و ايام الاجازات لأن ممكن تروح مثلا متحف تلاقيه قافل و يضيع عليك نص اليوم في الانتقالات . الموقع ده حتلاقوا عليه أيام الاجازات لكل متاحف و معالم باريس . http://bit.ly/17hFPVQ
عودة للاشياء المجانية : لو عاوز توفر تمن كرت المتاحف و تدخل المتاحف مجانا ‏‎wink‎‏ رمز تعبيري , كل أول يوم أحد من كل شهر أغلب متاحف باريس بتكون مجانا لكل الجمهور , بس خلي بالك حتلاقي طوابير كتير , فنظم وقتك كويس و شوف عاوز تبدأ بايه , و ابدأ يومك بدري أوي و فيه كمان متاحف كتير في باريس مجانا و الموقع ده فيه كل المتاحف المجانيه في باريس و مواعيد الدخول المجانيه http://bit.ly/1oZs533
طبعا باريس بلد الموضة و الأزياء بلد كريستيان ديور و ايف سان لوران و كوكو شانيل , بس طبعا أسعار الحاجات دي خياليه , و كفاية تتفرج عليها من بعيد و انت في الشانزليزيه , أو تزور المجمع الأشهر في باريس GALERIES LAFAYETTE , و تقدر تطلع للدور السابع فيه و تشوف منظر بانورامي رائع لباريس. نصيحه مهمه : لو بتفكر تروح الاوت ليت La Vallée Outlet Shopping Village شيل الفكره من راسك لانه بعيد عن مركز باريس و هو قبل ديزني بمحطه و أسعاره غاليه بردو مش رخيصه
أحسن وقت لزيارة باريس من شهر ابريل الى شهر نوفمبر ( ماعدا شهور الصيف 7 و 8 و ده أسوء وقت لزيارة باريس لأن كل حاجه بتبقى غاليه جدا و زحمه جدا ) فنصيحه متسافرش باريس في الصيف عموما .
طبعا أفضل صديق لك في رحلة باريس هو موبيلك اللي فيه GPS و خرايطك و خرايط المترو و عيش يا معلم
أتمنى الموضوع يكون عجبكم , و قدرت أفيدكم و لو بمعلومه بسيطه , و لو عاوز الكل يستفيد شير لكل أصحابك