الموضوع: معلومات هامة عن مرض السرطان

مرض السرطان، صحيح المرض ده موجود من زمان و لكن اكيد كلنا لاحظنا ان نسبته الآن اعلي بكتير من ايام الثمانينات و التسعينات. و اتوقع انه هيزيد اكتر في السنوات القادمة. لذلك مهم ان الناس اللي مش في المجال الطبي يفهموا ايه المرض ده بالضبط و بييجي من ايه عشان كل واحد يعمل اللي عليه بقدر استطاعته.


إليكم بعض المعلومات الأساسية:


1- السرطان مش ميكروب مش بكتيريا و لا فيروس. القصة كلها ان جين من الجينات اللي موجودة جوه كل خلية في جسمك تعرض ل mutation او خلل. الجين ده كان مسئول عن انقسام الخلية و نموها بشكل طبيعي. لكن عند حدوث خلل في الجين يترتب علي ذلك انقسام الخلية بصورة سريعة جدا فلا يكتمل نموها و يحدث تكتل و تكوين ورم عبارة عن مجموعة خلايا غير كاملة النمو. ثم بعد كده بينتشر و يدمر اعضاء اخري.


2- بما ان اساس المشكلة جينية لذلك شبه مستحيل نوجد في المستقبل علاج جذري للسرطان باستثناء الجراجة و استئصال الاورام. و ده لان الجينات موجوده في كل خلية و جسمنا فيه 10 و جنبها 14 صفر كعدد من الخلايا يعني يتعدي التريليون بمراحل. فهنصلح ايه و لا ايه. لذلك يا اما جراحة و كيماوي؛ يا اما من الاول خالص نبعد عن و نتجنب المسببات. صحيح امريكا بتحاول الآن ايجاد علاج جيني و لكن الابحاث اثبتت عدم نجاحه حتي الآن و اشك انهم هيوصلوا لحل.


3- الخلل اللي بيحدث في الجين مش بيجيلك كده من الهوا او من لا شيء. بل هناك مسببات اثبت العلم انها تتسبب في حدوثه.


ما هي المسببات او العوامل اللي ممكن تؤدي لتخريب للجين؟


# الاشعة بأنواعها سواء أشعة الشمس ال UV او الأشعة ال X-rays، اي اشعة عامة بيبقي جواها طاقة عالية بتبقي كفيلة انها تطير الكترون من ذرة الاكسوجين و بيتحول الي ما يسمي بال free radicals جوه جسمك. بتبقي عاملة كأن قرد محبوس في قفص و هايج و عمال يخبط في الجدران. ده بيؤدي الي دمار في الجين لا يمكن اصلاحه. لذلك لابد ان سعادتك ما تقعدش علي البحر كده طرزان و تعمل تان و الكلام ده. لازم تحمي جلدك ب sunscreen يكون رقمه عالي مش اقل من 50 خصوصا للناس اللي بشرتها فاتحة. الشمس اللي خابطة فيك طول النهار مليانة اشعة UV مسرطنة. و نفس الكلام ينطبق علي الناس اللي بتروح ال spa و تعمل جلسات UV عشان تسمر او تعمل tan. للمرة المليون الاشعة ال UV مسرطنة.


# الناس اللي عندها هوس و بتروح كل يومين تعمل اشعة في المعامل او المستشفيات يا ريت يخفوا شوية لان الاشعة عبارة عن طاقة و الطاقة زي ما شرحتلكم ضارة للجينات. خطر خطر خطر.


# عادم السيارات و الموتوسيكلات اللي مالية بلدنا الحبيبة. الهباب الاسود اللي بنشوفه طالع منهم ده المسرطن رقم واحد هو و دخان السجاير. يحتوي علي مواد كيميائية قادرة علي تحفيز حدوث خلل في الجينات او في الروابط اللي بين الجين و الجين اللي جنبه. و بالتالي حدوث السرطان. في معظم البلاد المتقدمة لما بيعدي علي تصنيع العربية سن معين بيفرموها. و احنا عندنا ما شاء الله تفتح الاعلانات تلاقي عربية للبيع موديل 81!!!!!؟؟؟ لابد من قانون جديد يمنع السيارت القديمة بأي شكل و الا انتظروا ان معدلات السرطان توصل لعنان السماء في مصر.


# الموبايلات اللي شغالة بال data. طول ما انت ماسكه بايدك و فيه data رايحة جاية بيبقي فيه مجال كهرومغناطيسي شغال حواليك بسببها و ده فيه طاقة و قد يسبب خلل في الجينات مع طول فترة استخدامه خصوصاً لو بتحطه جنب راسك و انت نايم و ال data شغال او لو بتحطه في جيبك و ال data شغالة. احذر من النقطة دي.


# اللمبات الموفرة اللي مالية البلد و المحلات. اللمبات دي جواها زئبق و الزئبق من المواد الكيميائية المسرطنة و لذلك منعوا في اوروبا الترمومترات اللي بالزئبق من زمان و احنا لسه عندنا موجوده ما شاء الله. خد بالك لو لمبة موفرة او ترمومتر اتكسروا انت كده في الباي باي. بالإضافة ان فيه جدال حول كمية الاشعة اللي طالعة من اللمبة الموفرة فأرجو الحذر. اللمبات العادية احسن و آمنة.


# اللحوم المصنعة زي اللانشون و الهوت دوج و السوسيس و الحاجات دي. اي لحمة معبئة في علب بيبقي فيها مواد حافظة و مواد تدي لون و الحاجات دي خصوصا في بلدنا اللي فيها الضمير الحي صاحي بتلاقيهم حاطين اردئ انواع الكيماويات و قد تسبب خلل جيني و سرطان أيضاً.


# الهرمونات. سواء هرمون الذكورة او الانوثة الاتنين لو لعبت فيهم و اخدت نسب زايدة عن الطبيعي انت كده بالسلامة. ما تاخدهمش الا لو نسبتهم قليلة عندك.


# الشيشة. عملتلها بند لوحدها لان سبحان الله فيه ناس الي يومنا هذا معتقدة ان الشيشة دي اخف بكتير من السجاير و انها حاجة لطيفة خالص و طعمها يجنن، اللي بالتوت و اللي بالبندق. يا جماعة حجر الشيشة الواحد بمقام 20 سيجارة في قلب بعض. و الدخان الناتج عنها اللي بنحبسه جوه صدرنا مليان كيماويات قادرة علي انها تسبب سرطان. فارجو الحذر.

جزاك الله خيرا ووفقك..
نسأل الله أن يحفظنا وإياكم والمسلمين من كل سوء ومكروه.