الموضوع: تعرف على شبكة لينكد إن

لينكدان ده عبارة عن شبكة تواصل اجتماعي زي فيسبوك وتويتر وكدة، بس لينكدان مختلف في الكام حاجة دول:
1- تقدر من خلاله تعرض خبراتك وكل حاجة عنك في شكل محترم وProfessional والمعلومات دي تكون مُتاحة لكل الناس.
2- تقدر من خلاله توصل لوظيفة في شركة بتحلم تشتغل فيها، 50% من الشركات في العالم بتنزل وظايفها بشكل حصري علي لينكدان، ده غير الـHead Hunters اللي كل شغلتهم في الحياة انهم يدوروا علي موظفين كويسين للشركات، وطبعًا لينكدان من أهم المواقع اللي بيدوروا فيها.
3- تقدر من خلاله تقرأ مقالات عظيمة ومفيدة جدًا في تخصصك من خلال LinkedIn Pulse.
4- ده غير انه بيئة رائعة تقدر من خلالها تكّبر الـProfessional Network بتاعتك وتتعرف على ناس في مجالك من كل دول العالم.
5- وأخيرًا وليس آخرًا، تقدر تجيب من عليه تاريخ أي بني آدم، اتخرج منين، اشتغل فين، خبرته ايه، وكمان تعرف رأي الناس فيه من خلال الـRecommendations اللي عنده.
دي شوية نصايح بسيطة تخلى الـAccount بتاعك Professional أكتر:
1. لازم تخلى الـProfile photo صورة شخصية ليك مبينة وشك، وياريت تكون formal شوية، فرصة إن حد يفتح الـAccount بتزيد 14 ضعف لو كنت حاطط صورة شخصية ليك.
2. العنوان الرئيسى اللى تحت إسمك لازم يكون مُلفت للنظر، هتلخص شخصيتك وخبرتك فى جملة واحدة بس تشد بيها الناس.
3. ضيف للأكونت بتاعك الـIndustry اللي انت شغال فيها.
4. فى الـContact حط الـPersonal E-mail بتاعك، وحط رقم موبايلك كمان عشان أى حد يقدر يوصلك بسهولة.
5. بالنسبة للـSummery، لازم تهتم بيه جدًا لإنه من أهم الحاجات اللى بتجذب أى حد بيدور على موظف، لازم تكتب فيه نبذة مُختصرة عنك، ويكون فيها Keywords عشان الناس توصلك لما تعمل Search عنها، وضيف الـCV بتاعك في الـSummery ، وكمان اكتب الـContacts بتاعتك عشان تسهل على الناس الوصول ليك.
6. بالنسبة للـExperience، بتكتب هنا كل التفاصيل اللى تخص خبرتك فى المجال بتاعك، وكمان الشركات اللى اشتغلت فيها قبل كدة، ونبذة عن وظيفتك فى كل شركة. اكتب تفاصيل عشان اللي بيقرأ يفهم ويقدر يكون وجهة نظر صح.
7. حاول تشترك فى الـGroups اللى تخص مجالك، ويكون ليك نشاط عليها عشان ده بيفرق جدًا فى الـSearch.
8. بالنسبة للـConnections، الأسطورة بتقول ان الـConnections يتقسموا لـ3 أجزاء، الجزء الأول يكون فيه ناس من مجالك وده بيكون 80% من الـConnections، والجزء التاني يكون فيه موظفي الـHR في الشركات اللي بتشتغل في مجالك واللي انت بتحاول تشتغل فيها وده بيكون 10%، أما الجزء التالت فبيكون ناس من برة مجالك اصلًا، ودول بتضيفهم عشان تكبر شبكة علاقاتك، والجزء ده بيكون الـ10% الباقيين.
9. عدد الـConnections اللي عندك شيء مهم جدًا في تقييم الأكونت بتاعك، وفيه كذا حاجة تقدر تعملهم عشان تكبر الشبكة بتاعتك:
- تقدر تضيف الناس اللي درست في نفس الكلية اللي انت درست فيها عن طريق Tab في الموقع اسمه Find Alumni بيطلعلك كل الناس اللي درسوا معاك.
- انشر الاكونت بتاعك علي اكونت فيسبوك وتويتر وأي شبكة تانية انت مشترك فيها.
- الموقع كمان بيوفرلك امكانية انك تضيف الناس اللي عندك ع الميل.
- شارك في الجروبات اللي انت مشترك فيها، اكتب Posts وعلّق علي موضوعات الناس، الناس هتاخد بالها انك موجود.
.
10. فيه جزء في الاكونت عن الـSkills بتاعتك، او المهارات اللي انت شافها في نفسك. في الجزء شوف انت بتعرف تعمل ايه وحطه، بس بلاش تبقى Over عشان الحاجات دي بتبان.
11. لو خدت كورسات قبل كدة ضيفها في الاكونت في الجزء الخاص بيها.
12. لو ليك خبراتك تطوعية ضيفها في الأكونت، في شركات كتير بيهمها الموضوع ده.
13. خليك محدد وانت بتضيف درجتك العلمية والمكان اللي اتعلمت فيه.
14. فيه جزء في الأكونت اسمه Recommendations، تقدر بكل شياكة كدة تطلب من زمايلك ومديرينك اللي اشتغلت معاهم قبل كدة يعملولك Recommend، ده هيزود تقل الأكونت بتاعك.
15. أخيرًا، لينكدان مش زي فيسبوك، بلاش الـPosts بتاعة الصعبانيات والجو بتاع فيسبوك ده، خليك Professional.