بعد اكثر من ٣٠ انترفيو في سنتين مع شركات امريكية واوربية خد المعلومات دي يمكن تفيدك
١- فيه مواقع زي Stackoverflow بتخليك تشوف فرص العمل المتاحة الي الشركات بتدعم فيها استخراج الاقامة والفيزا للمقبولين.
٢- لو قدمت علي وظيفة علي "لينكيد ان" شوف مين كاتب عن الوظيفة وادخل شوف البروفايل بتاعه علشان تظهر عنده في ال"who viewed your profile" ويقري ملفك وياحبذا لو تبعت بشكل شخصي للشخص ده تقوله ليه انت مناسب للشغل ده.
٣- متقدمش في كل الوظايف الي تقابلك لعل وعسي واحده فيهم تضرب وتلعب معاك، الناس المسئولين عن البحث عن موظفين بياخدوا مرتبات عاليه جدا ومعاهم ميزانيه عاليه جدا علشان يوظفوا ناس صح و مناسبيين مش علشان يقبلوا واحد بيحدف السي في في كل موقع يقابله.
٤- تابع اول باول مين شاف بروفايلك علي "لينكيد ان".
٥- حط نسخة من الCV وياحبذا لو تكون PDF علي لينكد ان.
٦- حاول يكون كلامك دايما في السي في او علي "لينكد ان" من غير رغي كثير وبيظهر بسهولة جدا اثرك في الاماكن الي اشتغلت فيها وخبراتك من غير "لت وعجن".
٧- لما تبعت ايميل لشركة توظيف او للاستفسار عن وظيفة استخدم Hupspot Sales Tool علشان تعرف تتابع الايميل وتشوف اتفتح امته ومين قراه و كل تفاصيل الي فتح الايميل:
https://www.hubspot.com/products/sales
٨- لما تعمل انترفيو Technical ويتطلب منك تبرمج حاجه offline وتسلمها بعد كده .. اكتب test cases لكل سطر علشان الناس دايما متوقعه انك تكتب الكود بالtest cases لو ده طبيعي في يوم شغل عادي حتي لو مطلبوش لان ده بيوضح قد ايه انت حريص ان يكون كودك test covered.
٩- لما يتطلب منك تسلم الكود علي Git Repo. حاول تخلي الcommits معبره و منظمه متقولش ده انترفيو لان ده جزأ من الانترفيو.
١٠- التزم بالوقت المحدد للتسليم حتي لو لسه الtask ناقصه .. ابعت الي خلصته وابعت ايميل تقول فيه انا شغال علي الباقي واعتذر عن التاخير.
١١- لما تحب تعرف تفاصيل عن اسئلة الانترفيو او مستوي المرتبات او راي العاملين في الشركة مش محتاج تدور كثير كل الي عليك انك تدخل علي glassdoor وتبحث عن الشركة وهتلاقي كل التفاصيل دي.
١٢- لما تكون بتناقش التفاصيل الماديه في الوظيفه وتتسال عن مرتبك في الشركة الحالية توقع دايما انك لو قولت مرتبك الحقيقي فمرتبك الي هتاخده هيبقي اعلي ٥-١٠٪ بالكثير من مرتبك الطبيعي، لو حابب تنط نطه كبيره اعلي بالرقم ١٠-٢٠٪ وهتاخد اوفر اعلي ١٥-٣٠٪ عن مرتبك الحالي .. لو ارقامك عاليه جدا عن امكانيات الشركة فبنسبة ٧٠٪ مش هيرفضوك علي طول لو هم مهتمين بيك .. هيقولوا لك ان طموحاتك اعلي من قدراتهم وهيدوك اوفر اقل من توقعاتك وانت هتقرر ده مناسب لك ولا لأ. افتكر برضه ان بالstrategy دي انت ممكن تضيع فرص كثير برضه (٣٠٪).
١٣- لو انت بتحلم باي وظيفة تخرجك من مصر وخلاص استغل كل فرصه تجيلك وامشي معاها لحد الاخر لحد ماربنا يكرمك لو انت بره بالفعل وبتحاول تحسن وضعك او مش مستعجل انك تخرج وبتدور علي فرصه حلوه .. نصيحة مني متضيعش وقت في الانترفيو الا لما تعرف الشركة الي بتعمل معاها انترفيو عندها استعداد تدفع كام .. لانت تقول لهم عاوز كام وهم يقولوا لك ده في حدود المتوقع ولا لأ "ده الي بيحصل كثير" او هم يقولوا لك ميزانيتهم للوظيفة دي وانت تقول عاوز تكمل انترفيو ولا لأ "ده نادر مايحصل .. لو محدش جاب سيرة الفلوس في الاول .. مش عيب انك تسال انت من الاول وتقولهم علشان عملت انترفيو مع شركات كثير وفي الاخر مكناش بنتفع و"بضيع وقتهم" .. كانك يعني حريص علي وقتهموده طبيعي جدا ومش بيضايق او بيدي اي انطباع سلبي .. الناس بتشتغل علشان الفلوس !!
١٤- لما تتسال في اخر اي انترفيو عندك استفسارات معينة !! لو الانترفيو لسه في الاول وانت عارف ان المشوار لسه طويل اكتفي بانك تقول انك عندك اسئلة كثير بس هتحب تسالها لما ربنا يكرم وتوصل لاخر مرحلة قبل ماتمضي العقد، لو انت في اخر مرحلة خلي نوعية اسئلتك من نوع انت بتشتغلوا ازاي ويوم العمل الطبيعي بيكون شكلة ازاي و التفاصيل دي علشان بيظهر قد ايه انت مهتم بمعرفة تفاصيل الوظيفة الي هتشتغل بيها ودي حاجه ايجابية وده حاجه فعلا انت محتاج تعرفها قبل ماتشتغل
١٤- الwork-life balance حاجه لا تقدر بمال .. دايما وانت بتحسب انتقالك لشركة جديده شوف قد ايه ده هياثر علي حياتك وقد ايه انت مستعد تضحي بوقتك و وقت اسرتك علشان عقد احسن او مناخ عمل احسن ..
١٥- مفيش تعامل مع اي recruiter او hr علي حسابات تواصل اجتماعي غير لينكيد ان علشان بنسبة كبيرة هيبقي فيه كلام في سياسة او رياضة او مسائل عامة بتعمل حساسية في بيئة العمل و ده مش حاجه حلوه
١٦- لو لغتك الاجنبية مش قوية ومش فاهم حاجه في الانترفيو اسال مره واثنين وثلاثه لحد ماتفهم السؤال .. انك تترفض علشان مش عارف الاجابه او علشان عندك مشكلة في التواصل احسن بكثير من انك تترفض علشان بتفتي وبتهري .. انا مره عملت انترفيو مع واحد صيني بيدعي انه بيتكلم انجليزي وانا مش فاهم ولا حرف منه وبعد ساعه ونص اشتكيت لمديره اني مش فاهم حاجه ونص الانترفيو كان تحسيس
١٧- لو عندك عرضين من شركتين والاثنين متوقعين انك هتوافق علي عرضهم .. اقبل الاحسن ليك ولاسرتك ولحلمك حتي لو كنت اقرب للموافقه علي عرض ثاني .. مش تتكسف انك ترفض او انك تخيب ظن حد كان عشمه فيك كبير .. مش تتكسف انك تشوف الفرص الاحسن .. الشركات دي لو حل عندها مشكلة ثاني يوم الصبح و مش حابه انها تشغلك هتقولك مع السلامة و مش هيفرق معاها لا انت ولا ١٠ زيك
١٨- في اخر كل خطوة في الانترفيو اسال ايه الخطوة الثانيه !!
١٩- قبل كل انترفيو اسال المفروض تتوقع ايه في الانترفيو ده !! يعني ده انترفيو technical ولا behavioral ولا ايه بالظبط .. ولو عارف هو ايه بالظبط حاول تعرف تفاصيل اكثر عنه .. هيبقي بلغة برمجة معينه او بframework معين !! وهتحتاج تكتب كود فيه ولا بس اسالة .. اسال هيبقي صوت وفيديو ولا صوت بس ؟! متدخلش الانترفيو الا وانت عارف انت بتعمل ايه ..
٢٠- لما تقدم في شركة مينفعش تدخل انترفيو وانت مش عارف هم بيعملوا ايه .. حاول تشوف كل انشطة الشركة واخبارها في اخر كام شهر و سنه .. حاول وانت في الانترفيو تظهر حجم البحث الي عملته عن الشركة و التحضير للانترفيو مش انك واحد جاي يجرب حظه ... حاول تشوف اشخاص لهم نفس المسمي الوظيفي بتاعك في الشركة الي مقدم فيها وتشوف خبراتهم وتقارنها بمستواك علشان تتخيل انت شخص مناسب لهم ولا لأ.
٢١- كلامك في الانترفيو والاجابات علي الاسئلة الbehavioral دايما بالارقام و الدلائل من شغلك الي فات .. مينفعش تقعد تتكلم في نظريات و احلام بدون اي دليل علي خبرتك العمليه ودعم لكلامك ده ..
دي حاجات بسيطة اتعلمتها مع الوقت و التجارب الي بمر بيها وهحدثها بتفاصيل اكثر كل ما افتكر حاجه
رد مع اقتباس