( على أد لحافك مد رجليك! )
( اللي يبص لفوق يتعب !)
(احلم على قدك !)
* دايما نسمع الأمثال دي في حياتنا .. لكن حد مننا فكر فيها قبل كده ؟؟
هل كل حاجه بنسمعها تبقى صح ؟؟ هل كل حاجه اتعودنا على سماعها , لازم نصدقها ؟
طيب .. عايزين نتكلم في الموضوع ده شوية و ندردش مع بعض...
استراتيجية تحقيق الأهداف
عشان تحقق هدفك لازم يكون ليك حلم.. لازم الحلم ده بيكون هو الوقود اللي بيحركك و بيديك الدوافع انك ماتيأسش..
ايه مواصفات الحلم ده ؟
القاعدة المهمة هنا هي :
ماتحطش سقف لأحلامك !! [مشاهدة الروابط متاحة فقط لأعضاء المنتدى .. ]براحتك... خليك طموح.. خليك متطلع.. لو حلمك صغير هاتفضل صغير.. لو حلمك كبير و مؤمن بيه ..يبقى لازم هاتحققه و تكون كبير...
كان فيه شاب معاق اسمه خالد حسان ..فقد ساقه اليسرى في حادث سيارة في العاشرة من عمره... الشاب ده كان حلمه إنه يعدي المانش..!!!
تخيل ؟؟ شايف الحلم ده ؟؟
سباحين عالميين حاولوا يعملوها عشان عبور المانش مش سهل.. التيارات البحرية و درجة الحرارة و المسافة المرهقة اللي كانت عقبة أمام أي سباح محترف... لكن خالد كان مؤمن بحلمه.. كان عارف إنه ممكن يعملها .. أكيد سمع ناس بتقول له : انت بتحلم.. أكيد ناس قالوا له : أكيد مش هاتنجح.. أكيد فيه ناس حاولوا يقنعوه بسخافة حلمه و إنه استحالة يقدر يحققه بسبب إعاقته...لأن مفيش معاق قدر يعدي المانش على مدى التاريخ ....
أقول لكم حاجة؟ خالد حسان هو أول معوق في العالم استطاع أن يعبر المانش سنة 1982 و حقق حلمه و حلم مصر اللي بنفخر بيه حتى الآن... إيه رأيك ؟
- أحكي لكم قصة تانية ؟ كان فيه ولد في مدرسة دسوق الإعدادية إسمه أحمد حسن.. كان مؤمن بحلم.. هو إنه يكون عالم كبير و يحقق اكتشافات علمية تسجل عالميا باسمه !!
شايف الحلم ده كبير ازاي ؟ الولد ده فضل مؤمن بحلمه و مايئسش من الظروف ....
استطاع (أحمد حسن زويل ) أن يحصل على جائزة نوبل في الفيزياء و يكون واحد من أعظم العلماء في التاريخ...
توماس إديسون كان بيحلم انه يخترع حاجه تنور بالكهرباء من غير وقود.. و عمل 999 تجربة فاشلة لحد ما الناس سخروا منه و من حلمه .. دلوقتي اللمبة في كل بيت..
بيل جيتس كان حلمه ان الكمبيوتر يكون في كل بيت.. الناس سخروا منه و من حلمه .. دلوقتي بقى فيه حاجه اسمها الكمبيوتر الشخصي زي اللي باكتب لكم عليه الموضوع ده .. شكرا على حلمك يا بيل جيتس !!
- هي إيه الحكاية ؟؟ عايزه تقولى إيه ؟
الحكاية يا سيدي كالتالي :
الحكاية إن الباحثين درسوا سلوك الناجحين في جميع المجالات .. اكتشفوا إن كل واحد فيهم كان له حلم إيجابي كبير و كان مؤمن بيه جدا لدرجة إنه مالتفتش لكلام الناس إللي حاولوا يحبطوه...
الحلم ده لازم يكون إيجابي و هدفه نبيل.. رسالة بيحملها الشخص ده و بيحاول يحققها...
( لو استطاع أي شخص أن يحقق شيئا ما.. ففي إمكانك أن تحققه!)... كلمة لريتشارد باندلر.
يبقى إياك تحط سقف لحلمك .. إياك تيأس .. خلي إيمانك بحلمك الإيجابي هو القوة اللي بتخليك تتخطى أي عقبة..
خلي إيمانك بحلمك قوي لدرجة إنك تقف و تتخطى أي صدمة.. لأنك مؤمن تماما إنك هاتوصل لهدفك في النهاية...
( كل الناس لديهم من الخبرات التي تؤهلهم لتحقيق تغيير إيجابي في حياتهم )... كلمة لريتشارد باندلر.
الأمثال اللي قلناها في أول العامود إياك تعمل بيها .. لو كانت تنفع زمان يبقى أكيد ماتنفعش في العصر اللي احنا فيه ده .. كل شيء ممكن طالما عندك هدف نبيل و حلم عايز تحققه..
خلي الأمثال للي فوق كالتالي :
( على أد لحافك مد رجليك! )
حوله إلى :
( جيب لحاف على أد رجليك !!)
و المثل الخاطئ اللي بيقول :
( اللي يبص لفوق يتعب !)
حوله إلى :
( إللي يبص لفوق , هايوصل فوق !!)
و الجملة اللي بتقول :
(احلم على قدك !)
خليها :
( ماتحطش سقف لأحلامك !!)
الحلم الكبير هو اللي بيصنع نجاحك.. [مشاهدة الروابط متاحة فقط لأعضاء المنتدى .. ]براحتك و تخطى كل الظروف و لازم تؤمن انك هاتحقق حلمك ده.. لو حلم إيجابي يبقى أكيد أكيد هاتعرف تحققه .. مفيهاش كلام...
بتحلم بإيه دلوقتي ؟؟؟
إبدأ حالا على تحقيقه !
رد مع اقتباس
