لسه فاكر .. ؟؟؟

. لسه فاكر اول مرة ركبت عجلة .. و وقعت على وشك واتعوّرت .. بس فرحتك بيها خدّرت ألمك مرة واتنين وتلاتة لحد ما بقيت رهوان ..

طيب فاكر كل مرة خفت فيها والدموع ملت عينك و قبل ما توصل قلبك .. كان مجرد حضن من امك او طبطبة على كتفك من ابوك علاج اى حزن و هم و خوف ..

ولا فاكر لما كنت بتستنى الدنيا تمطر عشان تخرج فى وسط المطرة وتلعب و تجرى كأنك ملكت الدنيا بين ايديك..

لسه فاكر لما كان اعلى مكان فى دنيتك كتاف ابوك وهو شايلك .. وادفى نومة كانت بين ايدين امك

طيب فاكر لما ماكنتش بتعرف بتنام ليلة العيد مستنى الليل يعدى عشان تلبس اللبس الجديد ..

و فاكر لما كانت عندك كلمة موت او فراق لغة متفهمهاش .. فى قاموس لسه ما اشترتهوش ..

فاكر لما كان الألم احساس بتحسه لما تتجرح .. او حتى احساس الحقنة اللى كنت طول عمرك بتكرهها وبيخوّفوك بيها ..

فاكر لما كانت الدموع سهلة و من حقك .. واد ايه كانت بتريّح ..

فاكر كل مرة زعلت من اخوك او صاحبك زمان .. و كنت تصفى بعد خناقة بالضرب او بالشتيمة او حتى بشد الشعر .. و بعدها ولو بثانية تلعبو و تهزّروا سوا ..

لسه فاكر صوت ضحكتك اللى كانت طالعة من القلب .. او حتى اسبابها الهايفة اللى كانت بتبسطك و تخليك فوق فى السما ..

ولا فاكر لما كنت بتحلم بجناحات .. وخاتم سليمان .. و بساط سندباد .. و قوس قزح ..


يا ترى ..


لسه فاكر الطفل جواك ..

ولا الزمن كبّره و كبّرك قبل الاوان .. ؟!!