امتي تعرف انك لازم تسيب الشغل الانت فيه:
تسيب الشغل الانت في فورا لما تحس بالاعراض الاتيه:
انك الصبح و انت رايح الشغل تتمني ان يحصل كارثه طبيعيه او انك تتقلب بيك العربيه و ما توصلش و انك تحس ان المستشفي ساعتها بالنسبه لك مكان الطف بكتير
٢-لما تحس و انت في اجتماع انك عايز تقطع شرايينك او تجيلك افكار شريره بانك عايز تقوم تطوح الضرب في كل الي قاعدين
٣-لما تبقي قاعد يوم السبت بالليل عمال تفتح عينيك بالعافيه عشان ما تنمش عشان الاجازه بتخلص
٤-اما تكون قاعد وسط الناس و تفتكر الشغل و تلاقي عينيك بترغرغ قدام الناس
٥-لما تحس دايما انك صعبان عليك نفسك و مش حابب حياتك
٦-لما توصل لمرحله انك بتفوت كل الحاجات و النشاطات و المناسبات المهمه في حياتك عشان حاجه اصلا انت مش حاببها
٧-لما دايما تلاقي نفسك مش قادر تدي ميعاد محدد عشان تعمل حاجه بتحبها لانك ببساطه ما تعرفش انت هتخلص الشغل امتي و فين
٨-لما تلاقي نفسك مخك واقف و بتنسي كتير و مش قادر تركز ولا توضب ايامك و الحاجات الي وراك و كمان تلاقي ان الغباء بيتمكن منك واحده واحده في صمت و كتمان


و اخيرا لما تلاقي نفسك اول اما بتقعد مع ناس بيعملوا الحاجات الانت بتحبها، تحس بقهره و تحس انك مش عارف انت مين


نصيحتي...اهرب فورا،،،الحياه قصيره اوي علي انك تقتل نفسك موت بطيء و ما يهمكش من حد ولا النصايح الفولاذيه بتاعت الاهل و الاصحاب لان علي فكره ما فيش حاجه تسوي الاحساس البشع الانت عايشه و بردو علي فكره، حاول تعرف انت بتحب ايه و ابتدي اتعلمه و اعمله و شوف هتعرف تخليه يطلعلك فلوس ازاي...خليك واثق ان ربنا خلق في كل حد فينا مميزات و مواهب لي هو بس، بس احنا ما اتعلمناش و لا اتربينا علي اننا نكتشفها و ننميها...اعرف نفسك و مش مهم عندك كام سنه، المهم توصل