بمناسبة أسعار البنزين الجديدة و شائعات انها هتزيد تاني، حبيت اشارك الناس شوية نصايح لتقليل استهلاك البنزين و هما سايقين


انا اشتغلت في Uber، واتعلمت من نفسي و من سواقين تانيين ازاي اوفر من تلت لنص البنزين الي كنت بستهلكه


النصائح دي تمشي على الاوتوماتيك و المانيوال بس طبعا الاوتوماتيك موفر اكتر بطبيعته


-متملاش ابدا اكتر من نص التانك، و متخليهوش يقل عن الربع، لو مليت التانك كله، استهلاكك هيزيد عشان وزن النص تانك الزيادة، و لو البنزين قل عن الربع فا في احتمالية ان الشوائب تدخل في دورة البنزين و تستهلك الطرمبة طاقة اكتر


-الRPM ميعديش 2500 ل 2750 و ده احسن وقت تنقل الغيار و بيوازن بين استهلاك البنزين و الاداء


-بلاش kick down او تسقيط نقلات و حرق او اي حاجة بتعلي ال RPM بسرعة، دايما خلي رجلك خفيفة عالبنزين و ال RPM يعلى بالتدريج


-استغل عزم القصور الذاتي للعربية او ال coasting، لما العربية تكون مجمعة سرعة كويسة و ال RPM حولين 2500، شيل رجلك من عالبنزين و متمورش و متدوسش دبرياش، سيب الغيار زي ما هو على ال D أو الغيار المناسب عشان ساعتها العجل هو الي بيخلي الموتور يلف و ميستهلكش نقطة بنزين، لو جبته على N الموتور بيسحب بنزين عشان ميقفش، الموضوع ده موفر بشدة، و مع الوقت هتتعلم تخلي معظم الوقت ماشي بالطريقة دي و قليل ما بتدوس بنزين


-رجلك خفيفة عالفرامل و فرمل من بدري و براحة، بلاش تكبس جامد، لما بتفرمل جامد و تتحرك تاني بتحتاج بنزين كتير عشان تحرك العربية من حالة الثبات، لو بتهدي و رجلك خفيفة مش هتحتاج بنزين عشان تكمل حركة تاني ده غير ان السواقة هتبقا اريح بالذات لما تدمج الموضوع ده مع ال coasting هتوفر بنزين كتير اوي


-شيل اي اوزان ملهاش لازمة في العربية، و شيل اي spoiler او اجنحة بتسبب downforce عالعربية، لو عندك شيالة فوق السقف و شلتها، هتوفر 20% من استهلاك البنزين، اقفل الازاز لو تقدر عشان تقلل ال drag اكتر


-حاول لو ماشي في طريق فاضي انك تلاقي السرعة المناسبة، الي هيا اعلى سرعة ممكنة بمجرد تحسيس بسيط عالبنزين و على أعلى غيار و RPM اقرب ما يمكن لل 2500


-لو واقف في اشارة بعداد وقت او زحمة جامدة اقفل العربية، دي من اكتر الحاجات الي بتحرق بنزين


-في الصيف افتح الازاز لو بتتحرك ببطأ و افتح التكييف لو ماشي بسرعة لأن ساعتها بيستهلك بنزين اقل من لو فتحت الازاز على سرعة عالية و دايما اتاكد من فلتر التكييف


-كل شوية كدة هات اي سائل من الي بينضفو الكاربيراتير او ال injection و استعمله، بيحسن استهلاك البنزين و اداء العربية، و كل فين و فين حط بنزين 95 هتحس بفرق شاسع


-حاول تمشي ورا عربية اكبر منك عشان تقلل من مقاومة الهواء، لو مشيت ورا عربية نقل كبيرة المقاومة هتقل بنسبة 90% و الاستهلاك يقل بنسبة من 20-40%


-اعمل صيانة العربية اول باول و اتاكد من ضغط العجل و الترصيص و ظبط الزوايا كل ده بيفرق في استهلاك البنرين


-غير الكاوتش لو عمره انتهى و خلي الجديد قدام لو جر أمامي و العكس لو دفع خلفي، و متجبس كاوتش عريض، الرفيع استهلاكه للبنزين اقل


اتمنى اي حد يستفيد و لو حد عنده نصائح تانية مؤكدة يفيدني معاه