يبدو إن الكوارث نازلة على كوكب الأرض بشكل متتالي سريع (زيادة الاحتباس الحراري - انفجار نووي روسي - ومؤخرا حرائق غابات الأمازون )..
حرائق الأمازون
عندما يكون الإنسان عامل دمار لا إعمار .
رئة الكوكب تحترق ..والارض تستغيث ..


الأمور دي لها أسباب كونية ، وأسباب شرعية دينية ..
الأسباب الدينية منها :
ما نزل بلاء أو تسلط إلا بذنب (وما أصابكم من مصيبة فبما كسبت أيديكم ....)
وتزداد الإشكاليات في آخر الزمان ..حيث تضطرب الأمور أكثر ،
وتكثر الفتن والتغيرات ..


طيب إيه هي الأسباب الأرضية لحريق غابات الأمازون ؟
والجوااااااب ..عندك بالتفصيل ..
أنت عارف كويس جدًا أن مساحة مصر كلها حوالي مليون كيلو متر مربع .. عاوز أقولك أن مساحة غابات الأمازون أكبر من ضعف مساحة مصر كلها! .. حوالي 2.1 مليون كيلو مربع ..


المساحة دي كلها مليانة نباتات تمتص غاز ثاني أكسيد الكربون وتنتج لنا 20% من أكسجين كوكب الأرض .. عشان كده يطلق على غابات الأمازون "رئة الأرض".


أنت عارف أن المسافة بين القاهرة وأسوان حوالي 800 كيلو؟ ..
لو قلتلك اضرب المسافة دي * 4 هيطلع الناتج 3200 كيلو ..
وده بُعد مدينة ساوباولو البرازيلية عن غابات الأمازون .. الصورة اللي حضرتك شايفها قدامك هي سماء ساوباولو البرازيلية العصر .. الدخان الناتج عن حريق غابات الأمازون حجب آشعة الشمس ..


والدخان ده بتقدر تشوفه من الأقمار الصناعية بكل سهولة لأن السحابة الدخانية الناتجة عن حرق الغابات تغطي حوالي 5 مليون كيلو متر مربع طبقا لقمر كوبرنيكوس التابع للاتحاد الأوروبي ..


وبالمناسبة الاتحاد الأوروبي كله على بعضه حوالي 4.5 مليون كيلو متر مربع .. يعني السحابة الدخانية أكبر من مساحة الاتحاد الأوروبي مجتمعة!


طب إيه المشكلة؟ ..
ماإحنا علطول بنسمع عن حرائق في غابات الأمازون! .. وده نتيجة طبيعية لظاهرة الاحترار العالمي لأن الظروف الحارة والجافة تجعل الغابات عرضة للاشتعال بكل سهولة؟ .. والسنة دي بنسجل تقريبًا ثالث أعلى مستويات الحرارة في تاريخ كوكب الأرض.


أحب أقولك أن كلامك صح جدًا ..
لكن في عندنا مشكلة أكبر ودي أعتقد السبب الرئيسي في ازدياد حرائق الغابات بالشكل ده عن أي سنة مضت! ..


إن الرئيس البرازيلي (واللي دولته عندها أكبر مساحة من غابات الأمازون) بيقولك "حماية الغابات مش أولوية بالنسبة لي ..
إحنا عندنا حاجات أهم .. عاوز أعمل طريق سريع هناك وسد كهرومائية" ..


وللأسف الكلام ده مش مجرد تصريحات وخلاص! .. كل الممارسات في غابات الأمازون العام الماضي تدل على كده بكل فجاجة .. أحب أقولك على شوية كوارث بتحصل:
- الشهر اللي فات بس (يوليو) .. تم إزالة 1345 كم مربع من غابات الأمازون .. ودي أكبر نسبة إزالة للغابات على الإطلاق في محيط الأمازون .. وعشان تكون متخيل معايا حجم الغابات اللي تمت إزالتها .. هي تقريبا نفس مساحة محافظة الجيزة بكل مدنها وقراها وظهيرها الصحراوي!


- الغابات تعتبر مصدر مهم جدًا للأخشاب، ولأن قطع أشجار الغابات للحصول على الأخشاب جرم في حق البشرية كلها .. الحكومة في الفترات السابقة قررت ضبط الأخشاب غير القانونية .. لكن الكارثة أن حكومة البرازيل الحالية ضبطت 1410 متر مكعب من الأخشاب دي مقارنة بـ 883000 متر مكعب تم ضبطهم العام الماضي في ظل الحكومة السابقة.


- المزارعون في الأمازون يقومون بتطهير الأرض عن طريق الحرق (زي حرق قش الأرز عندنا) .. ولأن الحرائق دي صعب السيطرة عليها نظرا للجفاف والظروف الحارة يتم فرض الغرامات على المزارعين الذين يقومون بالحرق .. لكن الكارثة بقى أن الغرامات دي انخفضت بنسبة 39% عن العام الماضي وكأن الحكومة البرازيلية تقول للمزارعين دمروا رئة الأرض براحتكم.


طيب ايه الأضرار اللي ممكن تسببهلنا احنا امام حرائق هائله بيقول اضرار كتيرة لانها بتستهلك نسبه ضخمه من الأكسجين الموجود في الغلاف الجوي بالاضافه من نسبه كبيره من انتاج الأكسجين هتقل اللي كان بيجي من الغابات و كمان بسبب الحرائق دي هترتفع نسبه ثاني أكسيد الكربون و الغازات الدفيئه و ده هيزود من مشكله الاحتباس الحراري و ارتفاع درجه الحراره عن اللي احنا فيه ...
ودا هيعمل كارثه اكبر و هي ارتفاع درجه حرارة القطبين هيدوب الجليد هناك و هترتفع نسبة البحار و المحيطات بنسبه كبيره و هتختفي دول و جزر كتيره و دلتا مصر من المناطق المهددة و ممكن مياه نهر النيل تختلط بمياه البحر كمان و هتختفي شواطئ كتيره في العالم أو معظمها كمان بالاضافه الي ان فيه حيوانات و أنواع كتير ممكن تنقرض و ده هيعمل خلل في السلسلة الغذائيه و هيهدد البشر و طبعا كمان ارتفاع نسبة ثاني أكسيد الكربون دي هيعمل أمطار حامضيه و دي برضو ليها أضرار كتير ...


عشان كده دول العالم اللي عارفة خطورة الكارثة دي بتتحرك .. فرنسا وأيرلندا تهدد بوقف التصديق على اتفاقية مهمة بالنسبة للبرازيل .. ألمانيا وبريطانيا والأمم المتحدة والعديد من مشاهير العالم ينددون .. لعل رئيس البرازيل يتحرك لإنقاذ الوضع الكارثي في غابات الأمازون والحفاظ على ماتبقى من أكسجين الأرض.


لو وصلت للسطر ده فأنا بحييك جدًا وأحب أقولك أن إحنا في شهر أغسطس ودي معلومة مهمة جدًا بالنسبة لك .. لأن ذروة حرائق غابات الأمازون بتكون في أواخر شهر سبتمبر فلازم تتحرك الحكومات بأقصى سرعة لإنقاذ كوكب الأرض ..