الموضوع: مسامير جحا

• ملكة بريطانيا لغت حفل عيد ميلادها مراعاة لشعور شعبها اللي بيعاني من أزمة أقتصادية.. أكيد دي لو في مصر كانت زمانها انتحرت
  
• يبدو ان إقالة إبراهيم عيسى هي اولى الخطوات على طريق الاستجابة لمطالب الراغبين في تعديل الدستور
  
• اليومين دول، لو عاوز تلبس حد مصيبة حطله كتاب خارجي في شنطة العربية وبلغ عليه.
  
• يا ترى لو مسكوا ولي أمر معاه 5 كتب خارجية.. هيتحبس اتجار ولا تعاطي؟
  
• نظيف يقول نحن الحكومة الوحيدة في تاريخ مصر التي التزمت بالأرقام وليس الشعارات..فعلا اسعار الخضروات والفواكه والبنزين واللحوم تدل على التزام اخلاقى لا مثيل له.
  
• وزير التعليم بيقول "الكتاب الخارجي يقتل في الطالب روح التعلم والإبتكار" طب ما الكتاب المدرسي بيقتل الطالب نفسه.
  
• الصورة المفبركة طلعت صورة تعبيرية وعقد مدينتي الفاسد اتضح انه خطأ اداري..تفتكروا انتخابات مجلس الشعب الجاية هيتقال عليها ايه؟
  
• لو فتحت جريدة وشوفت صورة للرئيس أوباما وأحمس وشارون وقائد الهكسوس بيناقشوا عملية السلام يبقى حاجة من اتنين، يا اما انت بتحلم، او بتقرا جريدة قومية
  
• خبر سار لكل سواقين الميكروباص والتوك توك .. تقدر دلوقتى تفول التنك من النيل مباشرة بعد تسرب مئات الأطنان بمياه النيل بأسوان وده بس بمناسبة العيد..وكل سنة وانتو طيبين
  
• تسهيلا على المواطنين قررت الحكومة نشر قائمة بأسماء المواطنين غير المستحقين لزكاة الفطر حيث بلغ عددهم 187 فرد.
  
• وزير الثقافة بيقولك لو رجع الزمن لرفضت الوزارة ..طب هو يعني لازم الزمن يرجع لورا عشان ترفض الوزارة، مينفعش ترفضها دلوقتى؟ ولا هي تلاكيك وخلاص؟
  
• صرح مسئول بارز بوزارة الثقافة بأنه سيتم بشكل مؤقت ولحين العثور على زهرة الخشخاش عرض اللوحة النادرة (قصرية البانجو) بدلا منها.
  
• بعد إنتاج التلفزيون المصري مسلسل (الجماعة) .. متهيألي المصريين كلهم عندهم استعداد يشاركوا في اكتتاب عام لإنتاج مسلسل ضخم بعنوان .. (الحزب).
  
• الحكومة بتقول شكرا لـ 80 مليون مصري لسه قادرين يعيشوا فى مصر
  
• محافظ القليوبيه بيقول ان انقطاع الكهرباء والمياه وارتفاع الاسعار تضاعف من ثواب الصائم.. يااااه واحنا اللي كنا ظالمين الحكومة وفاهمينها غلط
  
• يبدو انه فى مصر لا توجد محاسبة إلا فى كلية التجارة.
  
• الحكومة قالت إن الكهربة مش هتقطع في رمضان وأهي قطعت.. وكمان المية قطعت..وبكده تبقى الحكومة قطعت علينا مية ونور وفاضل الهوا علشان تبقى كملت.

من موقع مصراوي