اليوم قرأت مقالاً في إحدى الصحف المحلية تتحدث عن العنوسة وقد ذكرت ان في الأردن 100,000 عانس , بينما سمعت من مديرة جمعية الحرائر الأردنيات أن هناك 300,000 امرأة تجاوزت سن الثلاثين ولم تتجوز !!!!!
أين ذهب الشباب , ولماذا لا يقبلون على الزواج , هل تأثروا بالمنظور الغربي عن الزواج , فأصبح الزواج سجن الرجل و مملكة المراة ؟ هل يخافون الزواج ؟ ام أنه أصبح نظام اجتماعي فاشل ؟
لتعرف الإجابة دعنا نتكلم بلغة الشارع لكي أنقل لك الصورة من نبض الشارع وسيبنا من الفصحة



بصراحة ما بلوم الشباب , و بحسبة بسيطة بتعرف ليش الشباب بتهرب من الجيزة , مش رهبة أو عدم رغبة , ولاخوف , ولا حب حرية زي ما بدعوا , الموضوع بس معادلة رياضيات بسيطة جدا !
لو قلنا متوسط دخل الشاب من 200 – 500 دينار في المتوسط ولو قلنا تجاوزاً راتب الشب الأردني 350 دينار , بينما تكاليف الزواج من 10000 إلى 15000 للزواج المتوسط , وأكثر من نص هي المصاريف ما إلها داعي بس فشخرة , مشان ( إيش يقولوا عني الناس ) , وهاد إذا ما كان الزواج على طريقة خمسة بخمسة .
يعني .. خمسة مقدم خمسة مؤخر خمسة ذهب خمسة أثاث , والحفلة بفندق خمس نجوم وخمس أشهر عسل مش شهر واحد .
بفكروا الشب واقع على بير نفط
نيجي للراتب , بحسبة بسيطة ….

50 دينار مصاريف شهرية ثابتة ( بطاقات هاتف , اشتراك انترنت أو نادي ….)
30 دينار ملابس ( من جبل الحسن أو الهاشمي الشمالي وأحياناً من الطلياني أو من الــ ( CK MALL ) يعني بالة السكة في الزرقا بس مشان إذا حبيت تعرط سميها ( CK MALL ) )
45 دينار أكل وشرب.
45 دينار ذهاب وإياب للعمل … و بالأخير ما رح توفي معك ورح تطلع بخروج المغلوب .
50 مصاريف منوعة … طبعا بعد شد الأحزمة والإقتصاد واتباع سياسة العين بصيرة والإيد قصيرة , ودايما على لسانك معيش ومفلس .
20 دينار مصاريف طارئة من هون أو هناك .
وما بدنا نحسب الدخان مع العلم إنه 50 % من الشباب مدخنين .
مجموع المصاريف 240
350 – 240 = 90 دينار.
يعني لحتى يجمع الشب 9000 دينار بدو 100 شهر أو 8 سنين وربع … بسيطة ولا إشي يعني عضة كوساية !!!
وطبعا هاد مستحيل لإنو أي شب عندوا نص هالمبلغ بروح بشتري كيا سيفيا او هونداي أفانتي وانسى الجيزة .
وطبعا إنسى التضخم والغلا وارتفاع تكاليف المعيشة وتأكل الرواتب وارتفاع تكاليف العلاج وارتفاع والمواصلات … الخ
و الخلاصة : الشب إذا ما كان إلو أبو وضعوا ممتاز ومن الآخر أحسنلو ينسى , وبنضيف على المعادلة ( + 1 عانس ) .
أما البنت المسكينة إذا ما كانت ضمن المواضفات والمقاييس المطلوبة من حيث الجمال أو الراتب أو أبوها واصل ومدهن وبنت عيلة مشهورة ومعروفة ووزن كذا وطول كذا فما رح يلحقها الدور وما إلها إلا تعنس أو عريس الخيبة .

وبقولوا وين طاروا العرسان