قال عز وجل في كتابه العزيز الحكيم
بسم الله الرحمن الرحيم
قال رب العزة في الحديث القدسي ( الكِبـر ردائي من نازعني فيه قصمته)
وقال رسول الله صلى الله عليه وسلم : من مات دون أرضه فهو شهيد ، ومن مات دون عرضه فهو شهيد ، ومن مات دون ماله فهو شهيد .
الأسم في البطاقة احمد لكن ربه سماه شهيد خلفة ام مصرية واب عن الحق ماكان يحيد ربوه وعلموه على إن الحق عمره ماكان بعيد عن اللي يطلبه ويسعى وراه بإصرار وعزيمة من حديد وكمان علموه يقول كلمة الحق ولو على رقبته سياف زمن العبيد . علمونا زمان في الكتاتيب والمدارس والجوامع والكنايس نقول بلادي بلادي وبلاد العرب اوطاني ولما طالبنا بحقوقنا رجعونا للقهر تاني وفاكرين إن مصر مش ولادة دي اللي جابت احمد عرابي وسعد زغلول وحافظ سلامة قادرة تجييب ابطال وزعماء يرجعولها الحق تاني وهي دي أصل الحكاية بإختصار لأن ليل الظلم ولى وطلعت من تاني شمس النهار .
الظالم صحي يسأل كريه العدل النهارده كام من الشهر ياضنين ... قاله النهارده خمسة وعشرين من يناير ياحزين ... قوم واخلع من البلد ... الولاد في الميدان من ليلة امبارح مبيتين وللأرض فارشين وبالسماء متلفحين ... لا هامهم طل ولو حتى السماء مطرت عليهم طين.. قوم والحق بزين الدين وخليكوا في جدة ببعض متنوسين لحد ماشوفلي صرفة مع الولاد اللي في الميدان معتصمين ... لكن تقول ايه الظالم عيونه متغميين وودانه لكلمة الحق مسدودين واعتبر ولادنا خونة ولأرضه محتلين واعلن الحرب عليهم بدل اليهود الأسرائليين وقال لكريه العدل قدامك من الساعات اربعة وعشرين تفضيلي الميدان من الغزاة المحتلين ونقراء عليهم الصبح ولا الضالين امين . كريه العدل رد وقال للظالم احلامك اوامر ماهو انت طول عمرك يارس تحلم وانا لتحقيق احلامك مغامر واحلفلك بشرفي المتمرمغ في الطين لتمشي على جثثهم من بيتك لراس التين سوزان على يمينك وشمالك ولادك الأتنين اقولك ايه ياريس ماهو انتم حبايبي ونور العين
كريه العدل ادى الأوامر لرجالته اللي ماهماش أصلا مصريين ... يصطادوا الولاد بالبنادق وكأنهم عصافير في السماء طايرين ... ونسي انهم زي الجبال للآرض اوتاد ولحلمهم ساعيين وكلهم عزيمة وصبر وعناد ومش حيهمهم بنادق ولا سلاح ولا اي عتاد ... وفي ثمانية وعشرين من يناير بص وشاف كريه العدل العصفور اللي كان في السما طاير .. لقاه بقدرة قادر طير ابابيل بترميه هو وجنوده بحجارة من سجيل الطوبة تنزل تاخذ من رجالته بالقليل ستين ... اصله كان فاكر إن الولاد دول بتوع مامي وبابي وسيس ومدلعين وبضربة خرزانة على ظهره حيجري لمامي وعيونه مدمعين لكن لقاهم زي الوحوش راجل واحد وبالحق متسلحين ومالهمش غير مطلب واحد يرحل الظالم وعصابته النصابين ... واولهم انت ياعم البصاصين . احمد وزمايله الرجالة الصامدين هتفوا بصوت واحد الشعب يريد اسقاط النظام ياحزين لأجل مايرجع الحق للناس الغلابة المطحونين اللي بقالهم في الفقر والقهر من السنين ثلاثين .. رحمتك يارب العالمين .
عرف الظالم مطالب الولاد الشرعية...... لكن الغباء والصلف والعنجهية اللي بيتمتع بيهم الظالم وعصابته الحرامية خلاهم يصمموا على تصفية ولادنا تصفية جسدية يعني الضرب بالرصاص الحي والمطاطي بالبنادق الآلية . وداست على الزناد ايد الغدر اللي هي اكيد مش مصرية تصيب الولاد في عقولهم وقلوبهم النقية لكن عسكري الظالم والكريه بغبائه المعهود والمنشود مافكرش إن بطلقة الرصاصة ديه ختم على جبهته آيس من رحمة رب البرية ودخل جهنم من اوسع ابوابها النارية أصل البعيد عنكم كان معجون بطينة جهنمية ومش بس كده وكمان ده سلم بأيده مفتاح الجنة لكل شهيد . وترتفع الهتافات وتزيد بتطالب بمحاكمة الظالم العربيد على كل نقطة دم سالت من اي شهيد .
وهي دي أصل الحكاية بإختصار لأن ليل الظلم ولى وطلعت من تاني شمس النهار .
رد مع اقتباس